കൊച്ചി: ശബരിമലയിൽ അരവണ വിതരണം നിർത്തി വച്ചു. അരവണയിൽ ഉപയോഗിക്കുന്ന ഏലയ്ക്ക ഭക്ഷ്യയോഗ്യമല്ലെന്ന് കണ്ടെത്തിയതിനെ തുടർന്ന് പ്രസാദ വിതരണം നിർത്തണമെന്ന ഹൈക്കോടതി ഉത്തരവിന്റെ അടിസ്ഥാനത്തിലാണ് നടപടി. നാളെ മുതൽ ഏലയ്ക്ക ഉപയോഗിക്കാത്ത അരവണയാകും ഭക്തർക്ക് വിതരണം ചെയ്യുകയെന്ന് ദേവസ്വം ബോർഡ് വ്യക്തമാക്കി.
അരവണയിൽ ഉപയോഗിക്കുന്ന ഏലയ്ക്കയിൽ ഗുരുതര ആരോഗ്യപ്രശ്നങ്ങളുണ്ടാക്കുന്ന 14 തരം കീടനാശിനികളുടെ അംശം കണ്ടെത്തിയിരുന്നു. അനുവദനീയമായ അളവിൽ കൂടുതൽ കീടനാശിനി കണ്ടെത്തിയ സാഹചര്യത്തിൽ അരവണ വിതരണം നിർത്താൻ ആവശ്യപ്പെടുകയായിരുന്നു ഹൈക്കോടതി. ഭക്ഷ്യസുരക്ഷാ അതോറിറ്റി നടത്തിയ പരിശോധനയിലാണ് നിർണായകമായ കണ്ടെത്തലുണ്ടായത്.
ഏലയ്ക്ക ഗുണനിലവാരമില്ലാത്തതാണെന്ന് വ്യക്തമായതോടെ അരവണ പ്രസാദത്തിന്റെ സാമ്പിൾ കൂടി പരിശോധിക്കാനാണ് ഹൈക്കോടതിയുടെ നിർദേശം. സന്നിധാനത്ത് വിതരണം ചെയ്യുന്ന അരവണയിൽ പ്രശ്നമുണ്ടെന്ന് കണ്ടെത്തിയ ഏലയ്ക്ക ഉൾപ്പെടുത്തിയിട്ടില്ലെന്ന് ഭക്ഷ്യസുരക്ഷാ ഓഫീസർ ഉറപ്പുവരുത്തണമെന്നും ഹൈക്കോടതി നിർദേശിച്ചിട്ടുണ്ട്.
Comments