കാൻബെറ: ഓസ്ട്രേലിയയിൽ ക്ഷേത്രത്തിന് നേരെ ആക്രമണം. മെൽബണിലുള്ള ബിഎപിഎസ് സ്വാമിനാരായൺ ക്ഷേത്രമാണ് ആക്രമിക്കപ്പെട്ടത്. മെൽബണിലെ മിൽ പാർക്ക് ഏരിയയിലാണ് ക്ഷേത്രം സ്ഥിതിചെയ്യുന്നത്.
ക്ഷേത്രമതിലിന് ചുറ്റും ഖലിസ്ഥാനി മുദ്രാവാക്യങ്ങൾ എഴുതിയിട്ടുള്ളതായി ദൃക്സാക്ഷികൾ പറയുന്നു. ഹിന്ദുക്കൾക്കെതിരായ മുദ്രാവാക്യങ്ങളാണ് എഴുതപ്പെട്ടിരുന്നത്. കൂടാതെ ഇന്ത്യാ വിരുദ്ധ വാക്യങ്ങളും പ്രധാനമന്ത്രി നരേന്ദ്രമോദിക്കെതിരായ പ്രസ്താവനകളും മതിലിൽ എഴുതിയിട്ടുണ്ട്.
സ്പ്രേ പെയിന്റ് ഉപയോഗിച്ചാണ് ഇന്ത്യാ വിരുദ്ധ മുദ്രാവാക്യങ്ങൾ എഴുതിയിരിക്കുന്നത്. കൂടാതെ ഖലിസ്ഥാനി ഭീകരനായ ഭിന്ദ്രൻവാലെയെ പ്രകീർത്തിച്ചുള്ള മുദ്രാവാക്യങ്ങളും ക്ഷേത്രത്തിന് പുറത്ത് എഴുതി വച്ചിട്ടുണ്ട്. ആക്രമണം നടത്തിയത് ഖലിസ്ഥാൻ അനുകൂലികളാണെന്നാണ് മുദ്രാവാക്യങ്ങൾ സൂചിപ്പിക്കുന്നത്. ക്ഷേത്രത്തിനെതിരായ ആക്രമണം അവിശ്വസനീയമാണെന്ന് ഭാരവാഹികൾ പ്രതികരിച്ചു. വിഷയം അധികാരികളുടെ ശ്രദ്ധയിൽപ്പെടുത്തിയിട്ടുണ്ടെന്നും അവർ കൂട്ടിച്ചേർത്തു.
Comments