‘​​ഗില്ലാട്ടം’; വെടിക്കെട്ട് ഇരട്ട സെഞ്ച്വറി; ത്രില്ലടിപ്പിച്ച് ​ഗിൽ

ഹൈദരാബാദ്: ന്യൂസിലൻഡിന് എതിരായ ഒന്നാം ഏകദിനത്തിൽ ​വെടിക്കെട്ട് തീർത്ത് ​ഗിൽ. ഇരട്ട സെഞ്ച്വറിയുമായി ​ഗില്ല് മുന്നിൽ നിന്ന് നയിച്ചതോടെ 50 ഓവറിൽ എട്ട് വിക്കറ്റ് നഷ്‌ടത്തിൽ ഇന്ത്യ നേടിയത് 349 എന്ന കൂറ്റൻ സ്കോർ. ഹൈദരാബാദ് രാജീവ് ഗാന്ധി സ്റ്റേഡിയത്തിൽ കണ്ടത് ശുഭ്മാൻ ​ഗില്ലിന്റെ ത്രില്ലിം​ഗ് കളി. 145 പന്തിലായിരുന്നു ഗില്ല് ഡബിൾ സെഞ്ച്വറി നേടിയത്. ഇന്ത്യയുടെ ഓപ്പണറായി ഇറങ്ങിയ ഗിൽ 48.2 ഓവർ വരെ ക്രീസിൽ തന്നെ നിന്നു. 149 പന്തിൽ 19 ഫോറും 9 സിക്‌സറുമടക്കം 208 റൺസാണ് അടിച്ചു കൂട്ടിയത്.

ശ്രീലങ്കക്കെതിരായ കഴിഞ്ഞ ഏകദിനത്തിൽ സെഞ്ച്വറി എടുത്ത ചൂട് ആറി തീരുന്നതിന് മുമ്പാണ് ന്യൂസിലൻഡിനെതിരായ ഏകദിന പരമ്പരയിലെ ആദ്യ മത്സരത്തിൽ തന്നെ ഇരട്ട സെഞ്ച്വറി ​ഗില്ല് കയ്യിലൊതുക്കുന്നത്. ഇതോടെ ഒരു റെക്കോർഡും താരം തന്റെ പേരിലാക്കി. ഏകദിനത്തിൽ അതിവേഗം 1000 റൺസ് തികയ്‌ക്കുന്ന ബാറ്ററെന്ന റെക്കോർഡാണ് ​ഗില്ലിന് സ്വന്തമായിരിക്കുന്നത്.

87 പന്തിൽ കരിയറിലെ മൂന്നാം ഏകദിന സെഞ്ച്വറിയിലെത്തിയ ഗിൽ, 19 ഇന്നിംഗ്സുകളിൽ നിന്ന് 1000 റൺസ് പൂർത്തിയാക്കി. ഡബിൾ സെഞ്ച്വറി എടുക്കുന്ന അഞ്ചാമത്തെ ഇന്ത്യൻ ബാറ്ററാണ് ​ഗിൽ. സച്ചിൻ ടെണ്ടുൽക്കർ, വീരേന്ദർ സെവാഗ്, രോഹിത് ശർമ, ഇഷാൻ കിഷൻ എന്നിവരാണ് ഇതിന് മുമ്പ് ഈ നേട്ടം കൈവരിച്ചിരിക്കുന്നത്. എന്നാൽ, ഏകദിനത്തിൽ ഡബിൾ സെഞ്ച്വറി നേടുന്ന ഏറ്റവും പ്രായം കുറഞ്ഞ ക്രിക്കറ്റ് താരമായി ശുഭ്മാൻ ​ഗില്ല് മാറി. ഇതിന് മുമ്പ്, ബംഗ്ലാദേശിനെതിരെ റെക്കോർഡ് ഇരട്ട സെഞ്ച്വറി(131 പന്തിൽ 210) നേടി കൊണ്ട് ഇഷാൻ കിഷനായിരുന്നു ഈ റെക്കോർഡ് സ്വന്തമാക്കിയിരുന്നത്.