മലപ്പുറം: വീരമൃത്യു വരിച്ച ധീര ജവാൻ മലപ്പുറം അരീക്കോട് സ്വദേശി കെ.ടി നുഫൈലിന് നാടിന്റെ അന്ത്യാഞ്ജലി. സൈനിക ബഹുമതികളോടെ ജന്മനാട്ടിലെ കുനിയിൽ ഇരിപ്പാൻകുളീ ജുമാ മസ്ജിദിൽ ഭൗതികദേഹം ഖബറടക്കി. ആയിരക്കണക്കിന് ആളുകളാണ് ഭൗതികദേഹം അവസാനമായി കാണാനെത്തിയത്. കേണൽ ടി നവീൻ ബെഞ്ചിത്തിന്റെ നേതൃത്വത്തിലുള്ള സൈനിക ഉദ്യോഗസ്ഥരാണ് ഔദ്യോഗിക ചടങ്ങുകൾക്ക് നേതൃത്വം നൽകിയത്.
ശനിയാഴ്ച രാത്രി കരിപ്പൂർ വിമാനത്താവളത്തിലെത്തിയ മൃതദേഹം ജില്ലാ കളക്ടർ വിആർ പ്രേം കുമാറാണ് ഏറ്റുവാങ്ങിയത്. തുടർന്ന് കരിപ്പൂർ ഹജ്ജ് ഹൗസിൽ ഭൗതികദേഹം സൂക്ഷിച്ചിരിക്കുകയായിരുന്നു. തുടർന്ന് ഞായറാഴ്ച രാവിലെ 9 മണിയോടെയാണ് മൃതദേഹം വീട്ടിൽ എത്തിച്ചത്. കുറ്റൂളി കൊടവങ്ങാട് ഗ്രൗണ്ടിൽ പൊതു ദർശനത്തിന് വെച്ചു.
കനത്ത മഞ്ഞുവീഴ്ചയെ തുടർന്ന് ജോലിയ്ക്കിടെയിലായിരുന്നു സൈനികൻ വീരമൃത്യു വരിച്ചത്. വ്യാഴ്ച രാവിലെ നുഫൈലിന് ശ്വാസതടസ്സം അനുഭവപ്പെട്ടിരുന്നു. തുടർന്ന് ലഡാക്കിലെ സൈനിക ആശുപത്രിയിൽ ചികിത്സ തേടി. എന്നാൽ രോഗം മൂർച്ഛിച്ച് വൈകുന്നേരത്തോടെ മരണത്തിന് കീഴടങ്ങുകയായിരുന്നു.
കഴിഞ്ഞ എട്ട് വർഷമായി ആർമി പോസ്റ്റൽ സർവീസിൽ ശിപായി ആയി ജോലി ചെയ്ത് വരികയായിരുന്നു നുഫൈൽ. അസം,മേഘാലയ എന്നീ സംസ്ഥാനങ്ങളിൽ ജോലി ചെയ്ത ശേഷം ഒന്നര വർഷം മുൻപാണ് ഇദ്ദേഹം ലഡാക്കിലെത്തിയത്. ആറുമാസം കൂടി പൂർത്തിയാക്കി മറ്റൊരിടത്തേക്ക് മാറാനിരിക്കെയാണ് നുഫൈലിന്റെ വിയോഗം.
Comments