ന്യൂഡൽഹി : മഹാത്മാഗാന്ധിയുടെ രക്തസാക്ഷി ദിനത്തിൽ ശ്രദ്ധാഞ്ജലി അർപ്പിച്ച് പ്രധാനമന്ത്രി നരേന്ദ്രമോദി. അദ്ദേഹത്തിന്റെ സ്മൃതി മണ്ഡപമായ രാജ്ഘട്ടിലെത്തിയാണ് പുഷ്പാഞ്ജലി അർപ്പിച്ചത്.
രാജ്യത്തിന് വേണ്ടി ജീവൻ ത്യജിച്ച മഹത് വ്യക്തികളാണ് ഭാരതത്തിന്റെ അടിത്തറയ്ക്കും വികസനത്തിനും നാഴികക്കല്ലെന്ന് അദ്ദേഹം പറഞ്ഞു. സ്വദേശീയതയുടെയും സ്വാശ്രയത്തിന്റെയും പാത പിന്തുടരാൻ ഭാരതീയരെ പ്രചോദിപ്പിച്ച ബാപ്പുജിയ്ക്ക് പ്രണാമമർപ്പിക്കുന്നതായി അദ്ദേഹം ട്വീറ്റ് ചെയ്തു.
അമൃത കാലഘട്ടത്തിൽ മഹാത്മജിയുടെ വീക്ഷണങ്ങൾ സ്വീകരീക്കുന്നതാണ് അദ്ദേഹത്തിന് നൽകാവുന്ന ശ്രദ്ധാഞ്ജലിയെന്ന് കേന്ദ്ര ആഭ്യന്തര മന്ത്രി അമിത് ഷാ പറഞ്ഞു. മഹാത്മാ ഗാന്ധിയുടെ സ്മൃതി ദിനത്തിൽ കേന്ദ്ര പ്രതിരോധ മന്ത്രി രാജ്നാഥ് സിംഗും പ്രണാമം അർപ്പിച്ചു.ഗാന്ധിജി കാണിച്ച് തന്ന പാതയാണ് ഇന്ത്യയുടെ അടിത്തറയ്ക്കും പുരോഗതിയ്ക്കും കാരണമെന്ന് അദ്ദേഹം പറഞ്ഞു. അദ്ദേഹത്തിൽ നിന്നും പ്രചോദനം ഉൾക്കൊണ്ടാണ് ഇന്ത്യ പുരോഗതിയുടെ പാതയിലൂടെ നീങ്ങുന്നതെന്നും അദ്ദേഹം കൂട്ടിച്ചേർത്തു.
സത്യത്തിലൂടെയും അഹിംസയിലൂടെയും മനുഷ്യരാശിയുടെ ക്ഷേമത്തിനും സമാധാനത്തിനും വേണ്ടി പ്രയത്നിച്ച മഹാത്മാഗാന്ധിക്ക് പ്രണാമമർപ്പിച്ച് ബിജെപി ദേശിയ അദ്ധ്യക്ഷൻ ജെപി നദ്ദയും ട്വീറ്റ് ചെയ്തിരുന്നു.
Comments