ധനമന്ത്രി ആയതിന് പിന്നാലെ നിർമലാ സീതാരാമൻ അവതരിപ്പിക്കുന്ന അഞ്ചാമത് പൊതുബജറ്റിനാണ് പാർലമെന്റ് സാക്ഷ്യം വഹിച്ചത്. ഒട്ടേറെ മാറ്റങ്ങൾ ബജറ്റിൽ കൊണ്ടുവന്ന നേട്ടം നിർമലാ സീതരാമന് സ്വന്തം. ഇതോടെ ഏറ്റവും കൂടുതൽ ബജറ്റ് അവതരിപ്പിച്ച വനിത എന്ന് റെക്കോഡ് സ്വന്തമാക്കിയിരിക്കുകയാണ് ധനമന്ത്രി. ഏറ്റവും ദൈർഘ്യമേറിയ ബജറ്റ് തുടർച്ചായി നാല് തവണ അവതരിപ്പിച്ചതിന്റെ റെക്കോഡും നിർമ്മല സീതാരാമന്റെ പേരിലാണ് ചരിത്രം രേഖപ്പെടുത്തിയിരിക്കുന്നത്.
രാജ്യത്തെ ധനകാര്യമേഖലയെ സ്ത്രീയുടെ കരങ്ങളിൽ ഏൽപ്പിച്ചതിന് പിന്നാലെ അനവധി മാറ്റങ്ങളാണ് ബജറ്റിലുണ്ടായത്. ആദ്യത്തെ ‘പേപ്പർ ലെസ് ബജറ്റ്’ മുതൽ ‘ചുവന്ന സിൽക്ക് ബാഗ്’ വരെ അവതരിപ്പിച്ചതിന്റെ ക്രഡിറ്റ് നിർമലാ സീതാരാമന് സ്വന്തമാണ്. ബജറ്റ് രേഖകളുള്ള തുകൽ ബാഗിന് പകരം ചുവന്ന സിൽക്ക് ബാഗ് ആക്കിയത് നിർമലാ സീതാരാമൻ ആയിരുന്നു. 2021-ലാണ് കടലാസ് രഹിത ബജറ്റ് അവതരിപ്പിക്കുന്നത്. 2019 ജൂലൈയിൽ രണ്ട് മണിക്കൂറും 17 മിനിറ്റും ദൈർഘ്യമുള്ള ബജറ്റ് അവതരിപ്പിച്ച് റെക്കോഡ് സൃഷ്ടിച്ച് ധനമന്ത്രി പദം ധന്യമാക്കിയിരുന്നു.
ബജറ്റ് ദിനങ്ങളിൽ നിർമലാ സീതാരാമൻ ധരിക്കുന്ന സാരികൾക്കും ഏറെ പ്രത്യേകതയുണ്ട്. 2019 മുതൽ എല്ലാ ബജറ്റ് അവതരണ വേളയിലും അവർ ധരിച്ചിരുന്നത് കൈത്തറിയിൽ നെയ്‌തെടുത്ത സാരികളായിരുന്നു. കൈത്തറി നിർമിത സാരികളോട് നിർമലാ സീതാരാമന് പ്രത്യേക ഇഷ്ടമാണുള്ളത്. തന്റെ സാരി താൽപര്യത്തെ കുറിച്ച് ധനമന്ത്രി നേരത്തെ പറഞ്ഞിട്ടുണ്ട്.
കറുപ്പും സ്വർണവും കലർന്ന ബോർഡറോട് കൂടിയ ചുവപ്പ് നിറത്തിലുള്ള സാരി ധരിച്ചാണ് 2023-ലെ ബജറ്റ് അവതരിപ്പിക്കാനായി നിർമലാ സീതാരാമനെത്തിയത്. ഒപ്പം സ്വർണ നിറത്തിലുള്ള കമ്മലും വളകളും ധരിച്ച് അതി ലളിതമായാണ് ധനമന്ത്രി പാർലമെന്റിലെത്തിയത്. ഹിന്ദു സംസ്‌കാര പ്രകാരം ചുവപ്പ് സ്ത്രീ ശക്തിയുടെ പ്രതിരൂപമായ ദുർഗാദേവിയെ പ്രതിനിധീകരിക്കുന്നു.
