ദുൽഖർ സൽമാൻ നായകനാകുന്ന ബിഗ് ബഡ്ജറ്റ് മാസ് ചിത്രമാണ് പ്രശസ്ത സംവിധായകനായ ജോഷിയുടെ മകൻ അഭിലാഷ് ജോഷി ആദ്യമായി സംവിധാനം ചെയ്യുന്ന ‘കിംഗ് ഓഫ് കൊത്ത’. പ്രഖ്യാപനം മുതൽക്കെ ശ്രദ്ധ നേടിയ സിനിമയുടെ സെക്കന്റ് ലുക്ക് പുറത്തു വിട്ടിരിക്കുകയാണ് അണിയറ പ്രവർത്തകർ. ദുൽഖർ സൽമാന്റെ സിനിമാ ജീവിതം 11 വർഷം തികയുന്ന ദിവസമാണ് ചിത്രത്തിന്റെ സെക്കന്റ് ലുക്ക് റിലീസ് ചെയ്തിരിക്കുന്നത്. പോസ്റ്ററിനൊപ്പം തന്റെ സിനിമാ ജീവിതത്തെപ്പറ്റി ഹൃദ്യമായ ഒരു കുറിപ്പും ദുൽഖർ സൽമാൻ പങ്കുവെച്ചു.
‘എന്റെ ആദ്യ സിനിമ ഇറങ്ങിയിട്ട് 11 വർഷം. വിപരീതാർത്ഥകമായി ‘സെക്കന്റ് ഷോ’ എന്നയായിരുന്നു സിനിമയുടെ പേര്. ഇപ്പോൾ, സിനിമയിലെ എന്റെ രണ്ടാം ദശകത്തിൽ ഒരു നടനെന്ന നിലയിൽ കൂടുതൽ വളരാനും ഇതിലും വലിയ കഥകൾ പറയാനും ഞാൻ ശ്രമിക്കുന്നു. എന്റെ എല്ലാ സിനിമാ നിർമ്മാതാക്കളോടും സഹ അഭിനേതാക്കളോടും അണിയറപ്രവർത്തകരോടും എല്ലാറ്റിനുമുപരിയായി ലോകമെമ്പാടുമുള്ള പ്രേക്ഷകരോടും ഞാൻ നന്ദി പറയുന്നു. എനിക്ക് വളരെയധികം സ്നേഹവും പ്രോത്സാഹനവും ലഭിച്ചു. നിങ്ങളെ ഒരിക്കലും നിരാശപ്പെടുത്താതിരിക്കാൻ ഞാൻ നിരന്തരം പരിശ്രമിക്കുന്നു’.
‘വിമർശകരോടും വെറുക്കുന്നവരോടും എനിക്ക് നന്ദി പറയാനുണ്ട്. കാരണം, നിങ്ങളാണ് എന്നെ ആത്മപരിശോധന നടത്താനും വലിയ അവസരങ്ങൾ സ്വീകരിക്കാനും അപരിചിതമായ വഴികളിലൂടെ സഞ്ചരിക്കാനും പ്രേരിപ്പിക്കുന്നത്. പല സംശയങ്ങളും എന്ന അലട്ടിയ സമയത്ത് എന്റെ കൂടെ നിൽക്കുകയും എനിക്ക് വേണ്ടി സമയം കണ്ടെത്തുകയും ചെയ്ത എന്റെ കുടുംബത്തിനും സുഹൃത്തുക്കളും നന്ദി പറയുന്നു. എല്ലാ വർഷവും പോലെ ഈ വർഷവും ഞാൻ പരിഗണിക്കുന്നു. എനിക്ക് ഭാഗമാകാൻ കഴിയുന്ന ഏറ്റവും മികച്ച സിനിമാറ്റിക് അനുഭവങ്ങൾ നൽകി നിങ്ങളെ എല്ലാവരെയും രസിപ്പിക്കാൻ ഞാൻ ആഗ്രഹിക്കുന്നു. ഞാൻ എന്നത്തേക്കാളും സിനിമാ ലോകത്തോട് പ്രണയത്തിലാണ്. കിംഗ് ഓഫ് കൊത്തയുടെ രണ്ടാം ലുക്ക് എല്ലാവർക്കും സമർപ്പിക്കുന്നു’ എന്നാണ് ദുൽഖർ സമൂഹമാദ്ധ്യമങ്ങളിൽ കുറിച്ചത്.
രണ്ടു കാലഘട്ടങ്ങളിലെ കഥയാണ് കിംഗ് ഓഫ് കൊത്ത പറയുന്നത്. ജേക്സ് ബിജോയ്, ഷാൻ റഹ്മാൻ എന്നിവരാണ് സംഗീത സംവിധാനം നിർവഹിക്കുന്നത്. ആക്ഷന് ഏറെ പ്രാധാന്യമുള്ള ചിത്രത്തിന്റെ സംഘട്ടനരംഗങ്ങളൊരുക്കുന്നത് രാജശേഖറാണ്. ഛായാഗ്രഹണം -നിമീഷ് രവി, സ്ക്രിപ്റ്റ് -അഭിലാഷ് എൻ ചന്ദ്രൻ, എഡിറ്റർ -ശ്യാം ശശിധരൻ.
