ചെന്നൈ: ഏറെ നിരൂപക പ്രശംസ നേടിയ തമിഴ് ചിത്രം പരിയേറും പെരുമാളിലെ പ്രധാന കഥാപാത്രത്തെ അവതരിപ്പിച്ച നെല്ലായ് എം തങ്കരസു അന്തരിച്ചു. വാർധക്യ സഹജമായ അസുഖങ്ങളെ തുടർന്ന് ചികിത്സയിൽ കഴിയവെയായിരുന്നു അന്ത്യം. 65 വയസായിരുന്നു.
മാരി സെൽവരാജ് ചിത്രമായ പരിയേറും പെരുമാളിൽ പരിയൻ എന്ന കഥാപാത്രത്തിന്റെ അച്ഛനായി വേഷമണിഞ്ഞയാളാണ് നെല്ലായ് എം തങ്കരസു. ഒരു പ്രത്യേക വിഭാഗത്തിലെ ജനങ്ങൾ അഭിമുഖീകരിക്കുന്ന മനുഷ്യത്വമില്ലായ്മയുടെ പ്രതീകമായിരുന്നു തങ്കരസുവിന്റെ കഥാപാത്രം. അദ്ദേഹത്തിന്റെ വേർപാടിൽ സംവിധായകൻ മാരി സെൽവരാജ് അനുശോചനമറിയിച്ചു.
നർത്തകിമാരുടെ വേഷമണിഞ്ഞ് തെരുവുകളിൽ പ്രകടനങ്ങൾ കാഴ്ചവയ്‌ക്കുന്ന തെരുകൂത്ത് എന്ന കലാരൂപമായിരുന്നു യഥാർത്ഥ ജീവിതത്തിലും തങ്കരസു ചെയ്തിരുന്നത്. തന്റെ 17-ാം വയസിൽ ആരംഭിച്ച തെരുകൂത്ത് പിന്നീട് അദ്ദേഹം ഉപേക്ഷിച്ചിരുന്നു. കുടുംബവുമായി പാളയംകോട്ടയിലെ വണ്ണാർപേട്ടിലാണ് തങ്കരസു താമസിച്ചിരുന്നത്. ഗാന്ധി മാർക്കറ്റിൽ പച്ചക്കറികൾ വിൽപന നടത്തിയിരുന്ന അദ്ദേഹം സിനിമയിലെത്തിയതിന് ശേഷവും ഉപജീവനമാർഗത്തിൽ മാറ്റം വരുത്തിയിരുന്നില്ല. തങ്കരസുവിന് ഭാര്യയും ഒരു മകളുമുണ്ട്.
