തൊഴിലിടത്തേക്ക് തിരിച്ചെത്തുന്ന ഭാവനയ്ക്ക് ആശംസ അറിയിച്ച് തൊഴിൽ മന്ത്രി.’ന്റിക്കാക്കാക്കൊരു പ്രേമണ്ടാർന്ന്’ എന്ന ചിത്രത്തിന്റെ ട്രെയിലർ കണ്ടുവെന്നും,സ്വന്തം തൊഴിലിടത്തിലേക്ക് തിരിച്ചുവരുന്ന ഭാവനയ്ക്ക് ആശംസ നേരുന്നു എന്നുമാണ് മന്ത്രി ശിവൻകുട്ടി ഫേസ്ബുക്കിൽ കുറിച്ചത്. പോസ്റ്റിന് പിന്നാലെ നിരവധി പേരാണ് ആശംസകളുമായെത്തിയത്.
നേരത്തെ മലയാള സിനിമയിൽ നിന്നും മാറി നിന്നഭാവന ഐഎഫ്എഫ്കെ വേദിയിൽ അതിഥിയായി എത്തിയിരുന്നു. ഐഎഫ്എഫ്കെ വേദിയിൽ വെച്ചാണ് ഭാവന തിരിച്ചുവരവ് സംബന്ധിച്ച് സൂചന നൽകിയത്. ഭാവനയുടെ പുതിയ ചിത്രമായ ന്റിക്കാക്കാക്കൊരു പ്രേമണ്ടാർന്ന് ഈ മാസം 17 ന് തിയേറ്ററിലെത്തുകയാണ്.
ലണ്ടൻ ടാക്കീസും ബോൺഹോമി എന്റർടൈൻമെന്റ്സും ചേർന്ന് രാജേഷ് കൃഷ്ണ, റെനീഷ് അബ്ദുൾ ഖാദർ എന്നിവരാണ് ചിത്രം നിർമ്മിക്കുന്നത്. ഭാവന, ഷറഫുദ്ദീൻ എന്നിവർ കേന്ദ്ര കഥാപാത്രങ്ങളാകുന്ന ചിത്രം നവാഗതനായ ആദിൽ മൈമൂനത്ത് അഷറഫ് ആണ് സംവിധാനം ചെയ്യുന്നത്. അരുൺ റഷ്ദിയാണ് ചിത്രത്തിന്റെ ക്യാമറ കൈകാര്യം ചെയ്യുന്നത്. ബിജി ബാലാണ് പശ്ചാത്തല സംഗീതം ഒരുക്കുന്നത്. ഭാവന, ഷറഫുദ്ദീൻ, അനാർക്കലി നാസർ, അഫ്സാന ലക്ഷ്മി, ഷെബിൻ ബെൻസൻ എന്നിവരാണ് പ്രധാന വേഷങ്ങളിലെത്തുന്നത്.
