കാസർകോട്: വാട്സ്ആപ്പ് ഗ്രൂപ്പിൽ അശ്ലീല സന്ദേശമയച്ച സിപിഎം ലോക്കൽ സെക്രട്ടറിയെ പാർട്ടിയിൽ നിന്ന് പുറത്താക്കി. കാസർകോട് പാക്കം ലോക്കൽ സെക്രട്ടറി രാഘവനെതിരെയാണ് നടപടി. ജില്ലാ നേതൃത്വമാണ് നടപടി സ്വീകരിച്ചത്. പെരിയ ഇരട്ടക്കൊലക്കേസിലെ പ്രതിയാണ് രാഘവൻ.
മൂന്ന് ദിവസം മുമ്പായിരുന്നു പരാതിക്കാസ്പദമായ സംഭവം. പാർട്ടിയുടെ തന്നെ വാട്സ്ആപ്പ് ഗ്രൂപ്പിലേക്കായിരുന്നു ലോക്കൽ സെക്രട്ടറിയായ രാഘവൻ അശ്ലീല സന്ദേശമയച്ചത്. സ്ത്രീകൾ അടങ്ങുന്ന ഗ്രൂപ്പായിരുന്നു ഇത്. കേസിന്റെ വിചാരണയ്ക്കായി കൊച്ചിയിലേക്ക് പോകുന്നതിനിടെ വനിതാ നേതാവിന് അയച്ച സന്ദേശം അബദ്ധത്തിൽ ഗ്രൂപ്പിലേക്ക് വരികയായിരുന്നു. ഇതോടെ സംഭവം വിവാദമാവുകയും രാഘവനെതിരെ ഗ്രൂപ്പിലെ വനിതകൾ രംഗത്തെത്തുകയും ചെയ്തു.
ഇതിന് പിന്നാലെ രാഘവൻ വിശദീകരണവുമായി രംഗത്തെത്തിയിരുന്നു. നമ്പർ മാറിപോയതാണെന്നും ഭാര്യയ്ക്ക് അയച്ച സന്ദേശമാണെന്നുമായിരുന്നു നടപടി. എന്നാൽ ബ്രാഞ്ച് സെക്രട്ടറിയടക്കം ലോക്കൽ സെക്രട്ടറിക്കെതിരെ ശബ്ദമുയർത്തിയതോടെ നടപടി നേരിടേണ്ടി വന്നു.
