ന്യൂഡൽഹി: യാതൊരു അലംഭാവവും കാണിക്കാതെ ബജറ്റിലെ ഗുണങ്ങൾ ജനങ്ങളിലേക്ക് എത്തിക്കാൻ ബിജെപി എംപിമാരോട് പ്രധാനമന്ത്രി ആവശ്യപ്പെട്ടു. ബിജെപി പാർലമെന്റെറി പാർട്ടി യോഗത്തിൽ പങ്കെടുത്ത് സംസാരിക്കുകയായിരുന്നു പ്രധാനമന്ത്രി നരേന്ദ്രമോദി. ലോകമെമ്പാടും വലിയ സാമ്പത്തിക പ്രതിസന്ധിയിലൂടെ കടന്നുപോകുന്ന സമയത്ത് ഈ ബജറ്റ് കൊണ്ടുവരാനുള്ള കേന്ദ്രസർക്കാരിന്റെ ശ്രമത്തെ പ്രധാനമന്ത്രി അഭിനന്ദിച്ചു. ബജറ്റിനെക്കുറിച്ച് ജനങ്ങളോട് പറയുക എന്നത് വലിയ ഉത്തരവാദിത്തമാണെന്നും സമൂഹത്തിന്റെ എല്ലാ വിഭാഗത്തിനും വേണ്ടിയുള്ള കാര്യങ്ങൾ ബജറ്റിലുണ്ടെന്നും അദ്ദേഹം പറഞ്ഞു.
ബജറ്റിലെ ജനോപകരമായ പ്രഖ്യാപനങ്ങളും ഗുണ നേട്ടങ്ങളും യുവാക്കളിലേക്ക് എത്തിച്ചേരാൻ മത്സരങ്ങളും കായികവിനോദങ്ങളും ഉൾപ്പെടെയുള്ള വിവിധ പ്രവർത്തനങ്ങൾ സംഘടിപ്പിക്കാനും പങ്കെടുക്കാനും അതിർത്തി ജില്ലകളിൽ ഈ പ്രചരണവുമായി എത്തിച്ചേരാനും പ്രധാനമന്ത്രി ബിജെപി എംപിമാരോട് ആവശ്യപ്പെട്ടു. കേന്ദ്രത്തിൽ 2014 ലും,2019 ലും ബിജെപിക്ക് വൻ ഭൂരിപക്ഷം നേടാനായി. ബിജെപിയുടെ പ്രവർത്തനങ്ങളിൽ പൊതുജനങ്ങൾ സന്തുഷ്ടരാണ്. യാതൊരു അലംഭാവവും കാണിക്കരുത്. നമ്മൾ ജനങ്ങളുടെ ഇടയിലേക്ക് ഇറങ്ങിച്ചെല്ലണമെന്നും പ്രധാനമന്ത്രി പറഞ്ഞു.
ബിജെപി ദേശീയ അദ്ധ്യക്ഷൻ ജെപി നദ്ദ, യോഗത്തിനെത്തിയ പ്രധാനമന്ത്രിയെ അഭിനന്ദിക്കുകയും പുഷ്പഹാരം അണിയിക്കുകയും ചെയ്തു. കേന്ദ്ര ബജറ്റ് അവതരിപ്പിച്ചതിന് ധനമന്ത്രി നിർമ്മല സീതാരാമനെയും നദ്ദ അഭിനന്ദിച്ചു. എല്ലാ ചൊവ്വാഴ്ചയും ബിജെപിയുടെ യോഗം നടക്കുന്നുണ്ട്. പാർലമെന്റെറി പ്രവർത്തന സമയത്താണ് യോഗം ചേരുന്നത്.
Comments