എറണാകുളം : അന്താരാഷ്ട്ര വിമാനത്താവളത്തിൽ യാത്രക്കാരനിൽ നിന്നും സ്വർണ്ണം പിടികൂടി. 805.62 ഗ്രാം സ്വർണ്ണമാണ് കസ്റ്റംസ് പിടിച്ചെടുത്തത്. പാലക്കാട് സ്വദേശി റിഷാദിൽ നിന്നുമാണ് സ്വർണ്ണം പിടികൂടിയത്.
അബുദാബിയിൽ നിന്നു കൊച്ചിയിലെത്തിയ യാത്രക്കാരനായ ഇയാളെ സംശയത്തെതുടർന്ന് കസ്റ്റംസ് ഉദ്യോഗസ്ഥർ തടഞ്ഞ് പരിശോധന നടത്തി. തുടർന്നാണ് 40 ലക്ഷം രൂപ വിലമതിക്കുന്ന സ്വർണ്ണം ഇയാളിൽ നിന്ന് പിടിച്ചെടുത്തത്. 4 ക്യാപ്സൂൾ രൂപത്തിലാക്കിയ സ്വർണ്ണം ശരീരത്തിനുള്ളിൽ ഒളിപ്പിച്ചതുൾപ്പെടെ 805.62 ഗ്രാം സ്വർണ്ണമാണ് പിടികൂടിയത്.
കഴിഞ്ഞ ദിവസം സമാന രീതിയിൽ സ്വർണ്ണം കടത്താൻ ശ്രമിച്ച രണ്ട് യുവതികളെ കസ്റ്റംസ് പിടികൂടിയിരുന്നു. ഇവരിൽ നിന്ന് 54 ലക്ഷം രൂപ വിലമതിക്കുന്ന 1062.89 ഗ്രാം സ്വർണ്ണമാണ് കസ്റ്റംസ് പിടിച്ചെടുത്തത്.
ഈ മാസമാദ്യവും ഇതേ രീതിയിൽ സംഭവമുണ്ടായി. ദുബായിൽ നിന്നും വന്ന തൃശൂർ സ്വദേശിയുടെ പക്കൽ നിന്നും 26 ലക്ഷം രൂപ വിലമതിക്കുന്ന രണ്ട് സ്വർണ്ണ മാലകൾ കൊച്ചി വിമാനത്താവളത്തിൽ എയർ ഇന്റലിജിൻസ് യൂണിറ്റ് ഉദ്യോഗസ്ഥർ പിടിച്ചെടുത്തിരുന്നു.
Comments