ന്യൂഡൽഹി: മദ്യനയ കുഭകോണവുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ വൈഎസ്ആർ കോൺഗ്രസ് എംപിയുടെ മകൻ അറസ്റ്റിൽ. എംപി ഓംഗോളിലെ മഗുണ്ട ശ്രീനിവാസുലു റെഡ്ഡിയുടെ മകൻ രാഘവ് മഗുണ്ടയെയാണ് ഇഡി അറസ്റ്റ് ചെയ്തത്. കള്ളപ്പണം വെളുപ്പിക്കൽ തടയൽ നിയമ പ്രകാരമാണ് ഇയാൾക്കെതിരെ കേസെടുത്തിരിക്കുന്നതെന്ന് അന്വേഷണ സംഘം വ്യക്തമാക്കി. കേസിൽ മൂന്ന് ആഴ്്ചയ്ക്കിടെ ഒമ്പതാമത്തെ അറസ്റ്റാണ് രേഖപ്പെടുത്തിയത്.
കേസിൽ പഞ്ചാബ് മുൻ എംഎൽഎ ദീപ് മൽഹോത്രയുടെ മകൻ ഗൗതം മൽഹോത്രയെയും ചാരിയറ്റ് പ്രൊഡക്ഷൻസ് മീഡിയ പ്രൈവറ്റ് ലിമിറ്റഡ് എന്ന പരസ്യ കമ്പനിയുടെ ഡയറക്ടർ രാജേഷ് ജോഷിയെയും ഈ ആഴ്ച അറസ്റ്റ് ചെയ്തിരുന്നു. ഡൽഹി മദ്യനയ കുഭകോണ കേസുമായി ബന്ധപ്പെട്ട് ഇഡി നടത്തിയ പരിശോദനയിലാണ് അറസ്റ്റ് രേഖപ്പെടുത്തിയത്.
ഡൽഹി സർക്കാർ റദ്ദാക്കിയ മദ്യ നയത്തിന്റെ ഭാഗമായി മദ്യം ചില്ലറയായി വ്യാപരം നടത്തുന്നവരും മൊത്ത കച്ചവടക്കാരും നിർമ്മാതാക്കളും ‘സൗത്ത് ഗ്രൂപ്പ്’ എന്ന പേരിൽ ഉടമ്പടി സൃഷ്ടിച്ചു. ഓംഗോളിലെ മഗുണ്ട ശ്രീനിവാസുലു റെഡ്ഡിയുടെ മകൻ രാഘവ് മഗുണ്ടയ്ക്ക് ഇതിൽ പങ്കുണ്ടെന്ന് തെളിഞ്ഞതിന് പിന്നാലെയാണ് അറസ്റ്റ് ചെയ്തതെന്ന് ഔദ്യോഗിക വൃത്തങ്ങൾ അറിയിച്ചു. കേസിൽ ഡൽഹി ഉപമുഖ്യമന്ത്രി മനീഷ് സിസോദിയയും അദ്ദേഹത്തിന്റെ പിഎ ഉൾപ്പെടെയുള്ളവരെ നേരത്തെ ഇഡി പ്രതിപട്ടികയിൽ ചേർത്തിരുന്നു.
