എറണാകുളം: ബിജെപിയെ നേരിടാൻ ആരുമായും സഖ്യത്തിന് തയ്യാറാണെന്ന സിപിഎം ജനറല് സെക്രട്ടറി സീതാറാം യെച്ചൂരിയുടെ പ്രസ്താവനയെ സ്വാഗതം ചെയ്ത് എഐസിസി ജനറല് സെക്രട്ടറി കെസി വേണുഗോപാല്. എന്നാൽ, സിപിഎം കേരള ഘടകത്തിന് അന്ധമായ കോൺഗ്രസ് വിരോധമാണ് ഉള്ളതെന്നും കേരളത്തിലെ നേതാക്കൾക്കു കൂടി കാര്യങ്ങൾ മനസ്സിലാക്കി കൊടുക്കാൻ യെച്ചൂരി തയ്യാറാകണമെന്നും വേണുഗോപാൽ പറഞ്ഞു.
അതേസമയം, ത്രിപുര നിയമസഭ തിരഞ്ഞെടുപ്പിന്റെ ഭാഗമായി രാധാകിഷോർപൂരിൽ നടന്ന പ്രചാരണറാലിയിൽ സിപിഎം-കോൺഗ്രസ് സഖ്യത്തെ പരിഹസിച്ച് പ്രധാനമന്ത്രി നരേന്ദ്രമോദി രംഗത്തു വന്നു. സിപിഎമ്മും കോൺഗ്രസും കേരളത്തിൽ ഗുസ്തിയും ത്രിപുരയിൽ ദോസ്തിയുമാണെന്നാണ് പ്രധാനമന്ത്രിയുടെ പരിഹാസം.
വർഷങ്ങളായി ത്രിപുരയിലെ ജനങ്ങളെ കൊള്ളയടിച്ചവർ ഇത്തവണ തിരഞ്ഞെടുപ്പിൽ ഒന്നിക്കുകയാണ്. ജനങ്ങൾക്ക് വേണ്ടി മുദ്രാവാക്യം വിളിക്കുമെങ്കിലും ഇരുവരും അവരുടെ ബുദ്ധിമുട്ടുകൾ മനസ്സിലാക്കുന്നില്ലെന്നും ജനങ്ങളെ കടുത്ത ദാരിദ്ര്യത്തിലേക്ക് തള്ളിവിടുകയാണെന്നും മോദി തുറന്നടിച്ചു.
Comments