ഗാന്ധിനഗർ: ഗുജറാത്ത് നാഷണൽ ലോ യൂണിവേഴ്സിറ്റിയുടെ 14-മത് ഇന്റർനാഷണൽ മൂട്ട് കോർട്ട് മത്സരം ഉദ്ഘാടനം ചെയ്ത് ലോക്സഭാ സ്പീക്കർ ഓം ബിർള. ഇന്ത്യയിലും മറ്റ് രാജ്യങ്ങളിലും സാമൂഹികവും രാഷ്‌ട്രീയവുമായ മാറ്റങ്ങൾക്ക് അഭിഭാഷകർ മഹത്തായ സംഭാവനകൾ നൽകിയിട്ടുണ്ടെന്നതിന് ചരിത്രം സാക്ഷിയാണെന്ന് ഓം ബിർള പറഞ്ഞു. നിയമം ഒരു തൊഴിലായി തിരഞ്ഞെടുത്തതിന് വിദ്യാർത്ഥികളെ അദ്ദേഹം അഭിനന്ദിച്ചു. ഗാന്ധിനഗറിൽ വച്ച് നടക്കുന്ന മത്സരത്തിന്റെ ഉദ്ഘാടന ചടങ്ങിൽ സംസ്ഥാന നിയമമന്ത്രി റുഷികേശ് പട്ടേലും പങ്കെടുത്തു. ജിഎൻഎൽയു ഗവേണിംഗ് കൗൺസിൽ അംഗം കൂടിയാണ് പട്ടേൽ.
കരട് ബില്ലുകളിൽ സർക്കാരുകൾ അഭിപ്രായങ്ങളും നിർദ്ദേശങ്ങളും ക്ഷണിക്കുമ്പോൾ പ്രതികരിച്ച് നിയമനിർമ്മാണത്തിൽ സജീവമായി പങ്കെടുക്കാൻ ഓം ബിർള വിദ്യാർത്ഥികളോട് ആഹ്വാനം ചെയ്തു. ജനങ്ങൾക്കിടയിൽ നിയമത്തെക്കുറിച്ചുള്ള അവബോധം വളർത്തുന്നതിന് തങ്ങളുടെ അറിവും സമയവും വിനിയോഗിക്കണമെന്നും ബിർള വിദ്യാർത്ഥികളോട് അഭ്യർത്ഥിച്ചു.
നിയമത്തെക്കുറിച്ച് ജനങ്ങൾക്കിടയിൽ അവബോധം വർദ്ധിക്കുന്നതിനനുസരിച്ച് ജനാധിപത്യം കൂടുതൽ ശക്തമാകും സാധാരണ പൗരന്മാർ നിയമത്തെക്കുറിച്ച് ബോധവാന്മാരാണെങ്കിൽ, അത് ജനാധിപത്യത്തെ ശക്തിപ്പെടുത്തുന്ന കൂടുതൽ ഉത്തരവാദിത്തവും സുതാര്യവുമായ ഭരണത്തിലേക്ക് നയിക്കുമെന്നും അദ്ദേഹം പറഞ്ഞു.
വിദേശ ടീമുകൾ ഉൾപ്പെടെ 28 ടീമുകളാണ് ഈ വർഷം പങ്കെടുക്കുന്നത്. പ്രാഥമിക റൗണ്ടുകൾ ഫെബ്രുവരി 16, 17 തീയതികളിലും ക്വാർട്ടർ ഫൈനൽ റൗണ്ടുകൾ ഫെബ്രുവരി 18-നും അവസാന റൗണ്ട് ഫെബ്രുവരി 19-നും നടക്കും.
