ദക്ഷിണാഫ്രിക്കയിൽ നിന്ന് 12 ചീറ്റകളെ വിമാനമാര്ഗമായി ഇന്ത്യയിലെത്തിച്ചത് വൻ വാർത്താ പ്രാധാന്യം നേടിയതാണ്. ഇന്ന് അവയെ കുനോ നാഷണൽ പാർക്കിൽ എത്തിച്ചു. ചീറ്റകളെ ഇന്ത്യയിൽ പുനരവതരിപ്പിക്കുന്നതു സംബന്ധിച്ചു ഇന്ത്യയും ദക്ഷിണാഫ്രിക്കയും തമ്മിൽ ഉണ്ടാക്കിയ കരാറിന്റെ അടിസ്ഥാനത്തിലാണ് ഇവ ഇന്ത്യയിൽ എത്തിയത്. എന്നാൽ നാം നിത്യവും വാർത്തകളിൽ കാണുന്നതും ചീറ്റകളോട് സാമ്യമുള്ളതുമായ മറ്റൊരു ഇനമാണ് പുള്ളിപ്പുലി. എന്താണ് ഇവ തമ്മിലുള്ള സാമ്യ-വ്യത്യസങ്ങൾ എന്ന് നമുക്കൊന്ന് നോക്കാം.
ചീറ്റകളും പുള്ളിപ്പുലികളും മാർജ്ജാര വർഗ്ഗത്തിൽ പെട്ടവരാണ്. ആഫ്രിക്കയിലാണ് ഇവയെ ധാരാളമായി കാണപ്പെടുന്നത്. കാഴ്ചയിൽ രൂപ സാദൃശ്യം തോന്നുമെങ്കിലും ഇവ രണ്ടും വ്യത്യസ്തരാണ്. ശാരീരിക മാറ്റങ്ങളും പെരുമാറ്റത്തിലും മാറ്റങ്ങളുണ്ട്. എന്നാലും പലർക്കും ചീറ്റപ്പുലികളെയും പുള്ളിപ്പുലികളെയും തിരിച്ചറിയാൻ ബുദ്ധിമുട്ടാണ്.
മണിക്കൂറിൽ 80 മുതൽ 128 കിലോമീറ്റർ വരെ വേഗതയിൽ ഓടുന്ന ഏറ്റവും വേഗതയേറിയ മൃഗമാണ് ചീറ്റ. വെറും മൂന്ന് സെക്കൻഡിനുള്ളിൽ പൂജ്യത്തിൽ നിന്ന് 95 കിലോമീറ്റർ വേഗത കൈവരിക്കാൻ അവക്ക് കഴിയും. എന്നാൽ പുള്ളിപ്പുലികൾ വേഗത്തിൽ ചാടുന്നവയാണ്. സെക്കന്റിൽ 20 മീറ്റർവരെ അകലത്തിൽ ചാടാനുള്ള കഴിവുള്ളവരാണ് ഈ മാർജ്ജാര വർഗ്ഗം. ഇവ ചാടിയും കുതിച്ചും ഇരയെ വേട്ടയാടുന്നു, തന്നെക്കാൾ വലിപ്പമുള്ള ഒരു മൃഗത്തെ കൊല്ലാൻ കഴിയുന്ന ശക്തവും എന്നാൽ ചടുലവുമായ മൃഗങ്ങളാണിവ.
ചീറ്റകളെയും പുള്ളിപ്പുലികളെയും തിരിച്ചറിയാനുള്ള ഏറ്റവും എളുപ്പ മാർഗ്ഗം അവയുടെ ശരീരത്തിലെ പാടുകൾ തന്നെയാണ്.
ചീറ്റപ്പുലികൾക്ക് ശരീരത്തിൽ കറുത്ത വലിയ പൊട്ടുകൾ പോലുള്ള പാടുകളുണ്ട്. പുള്ളിപ്പുലികൾക്ക് പൂവിതളുകൾ പോലുള്ള പാടുകളുമാണ്. പുള്ളിപ്പുലികളുടെ രോമത്തിന്റെ നിറം മഞ്ഞയും ചീറ്റകളുടെത് തവിട്ട് നിറവുമാണ്.
ചീറ്റകളുടെ മുഖത്ത് മൂക്കിനടുത്തായി കണ്ണീർ വരകളുണ്ട്. ചീറ്റകളുടെ കൺകോണിൽനിന്ന് ആരംഭിക്കുന്ന ഈ വര മൂക്കിന് താഴെ അവസാനിക്കുന്നു. മാത്രവുമല്ല തലയുടെ ആകൃതിയിലും വ്യത്യാസമുണ്ട്. ചീറ്റയ്ക്ക് ചെറുതും നന്നായി വൃത്താകൃതിയിലുള്ളതുമായ തലയാണുള്ളത്, എന്നാൽ പുള്ളിപ്പുലിക്ക് കൂടുതൽ നീളമേറിയ തലയും മുഖത്ത് ഇരുണ്ട കറുത്ത പാടുകളുമുണ്ട്. കൂടാതെ, ചീറ്റയ്ക്ക് ചെറിയ പല്ലുകളും താടിയെല്ലുകളും വലിയ മൂക്കുമാണ്. പച്ചയും നീലയും കലർന്ന നിറമുള്ള കണ്ണുകളാണ് പുള്ളിപ്പുലികൾക്ക്. ചീറ്റയ്ക്ക് തീയുടെ നിറമുള്ള കണ്ണുകളാണ്. ഒറ്റ നോട്ടത്തിൽ ചീറ്റപ്പുലികളെയും പുള്ളിപ്പുലികളെയും ഇത്തരത്തിൽ മനസ്സിലാക്കാൻ കഴിയും
ചീറ്റകൾക്ക് അലറാൻ കഴിയില്ല. ഉച്ചത്തിൽ കരയുന്ന ഇനമാണ് ചീറ്റകൾ. പുള്ളിപ്പുലികൾക്ക് ഉച്ചത്തിൽ അലറാൻ കഴിയും. പുള്ളിപ്പുലി പൊതുവേ ഒറ്റപ്പെട്ട മൃഗമാണ്. കൂടുതലും മറഞ്ഞിരിക്കുന്ന മൃഗമാണ് പുള്ളിപ്പുലി. അവർ പകൽ സമയത്ത് മരക്കൊമ്പുകളിലും മറ്റും ആഭയം പ്രാപിക്കുന്നു. രാത്രിയിലാണ് പൊതുവേ പുള്ളിപ്പുലികൾ വേട്ടയാടുന്നത്. പുള്ളിപ്പുലികൾക്ക് വേഗത്തിൽ നീന്താൻ കഴിയും. വെള്ളത്തെ ഇഷ്ടപ്പെടുന്ന ഇനമാണ് പുള്ളിപ്പുലികൾ. ഇവ പൊതുവേ വേട്ടയാടുന്ന ഇരയെ മരത്തിന് മുകളിൽ വെച്ചാണ് ഭക്ഷിക്കുന്നത്. പുള്ളിപ്പുലികൾ 15 വർഷം വരെ ജീവിക്കുന്നു. എന്നാൽ മൃഗശാലയിലും മറ്റും പരിപാലനം കിട്ടി ജീവിക്കുന്ന പുള്ളിപ്പുലികൾ 23 വർഷം വരെയും ജീവിക്കുമെന്നാണ് കണക്ക്. പക്ഷെ ചീറ്റകൾക്ക് 12 വർഷം വരെയാണ് ആയൂർദൈർഘ്യം.
Comments