സ്വകാര്യതയിലേക്ക് കടന്നുകയറുന്ന പ്രസ് ഫോട്ടോഗ്രഫിക്കെതിരെ നടി ആലിയ ഭട്ട്. സംഭവത്തിൽ നടി നേരിട്ട അസൗകര്യത്തെക്കുറിച്ച് പരാതി സമർപ്പിക്കണമെന്ന് ബാന്ദ്രാ പോലീസ് ആവശ്യപ്പെട്ടു. പാപ്പരാസികൾക്കെതിരെ തുറന്നടിച്ച് ആലിയ ഭട്ട് ഇൻസ്റ്റഗ്രാം പോസ്റ്റ് പങ്കുവച്ചതിന് പിന്നാലെയാണിത്.
നടി വീട്ടിലിരിക്കുന്ന ചിത്രങ്ങൾ അനുവാദമില്ലാതെ പകർത്തിയതോടെ തന്റെ അതൃപ്തി അവർ അറിയിച്ചിരുന്നു. ആലിയ താമസിക്കുന്ന ഫ്ളാറ്റിന്റെ തൊട്ടടുത്ത ടെറസിൽ ഒളിച്ചിരുന്നാണ് പാപ്പരാസികൾ താരത്തിന്റെ ചിത്രം പകർത്തിയത്. തന്റെ സ്വകാര്യതയിലേക്കുള്ള കടന്നുകയറ്റം അനുവദിച്ച് നൽകാൻ കഴിയില്ലെന്ന് ആലിയ വ്യക്തമാക്കി. ഇക്കാര്യവുമായി ബന്ധപ്പെട്ട് ഇൻസ്റ്റഗ്രാമിൽ പോസ്റ്റ് പങ്കുവച്ചതോടെ സംഭവം വിവാദമാവുകയും ചെയ്തു. മുംബൈ പോലീസിനെ ടാഗ് ചെയ്യുന്നതായിരുന്നു ഇൻസ്റ്റഗ്രാം പോസ്റ്റ്.
”എന്റെ വീട്ടിലിരിക്കുകയായിരുന്നു ഞാൻ. ഉച്ചതിരിഞ്ഞ് സാധാരണയായുള്ള ഇരിപ്പ്.. സ്വീകരണമുറിയിലായിരുന്നു ഞാൻ.. ആരോ നിരീക്ഷിക്കുന്നുണ്ട് എന്ന് തോന്നി. തലയുയർത്തി നോക്കിയപ്പോൾ സമീപത്തെ ടെറസിൽ ക്യാമറയുമായി രണ്ടുപേർ നിൽക്കുന്നത് കണ്ടു. ഇത് ശരിയാണെന്ന് കരുതുന്നുണ്ടോ? എല്ലാത്തിനും ഒരു അതിരുണ്ട് ” ഇതായിരുന്നു നടിയുടെ പോസ്റ്റ്. തുടർന്ന് സംഭവത്തിൽ പരാതി സമർപ്പിക്കാൻ നടിയോട് ആവശ്യപ്പെടുകയായിരുന്നു പോലീസ്.
Comments