ജോണ്‍ വര്‍ഗീസ് സംവിധാനം ചെയ്ത് 2015ൽ പുറത്തിറങ്ങിയ ചിത്രമാണ് അടി കപ്യാരേ കൂട്ടമണി. ഫ്രൈഡേ ഫിലിം ഹൗസിന്റെ ബാനറിൽ സാന്ദ്ര തോമസ്, വിജയ് ബാബു എന്നിവർ ചേർന്ന് നിർമ്മിച്ച ഈ ചിത്രത്തിൽ മുകേഷ്, ധ്യാൻ ശ്രീനിവാസൻ, നീരജ് മാധവ്, അജു വർഗ്ഗീസ്, നമിത പ്രമോദ് തുടങ്ങിയവരാണ് പ്രധാന വേഷങ്ങളെ അവതരിപ്പിച്ചത്. ക്രിസ്തുമസ് ദിനത്തിലാണ് അടി കപ്യാരേ കൂട്ടമണി പ്രദർശനത്തിനെത്തിയത്. ചിത്രത്തിന്റെ വൻ വിജയത്തിന് ശേഷം രണ്ടാം ഭാഗത്തിന് വേണ്ടി കാത്തിരിക്കുകയാണ് സിനിമ പ്രേമികള്‍.
നാളെ റിലീസ് ചെയ്യുന്ന ഓ മൈ ഡാര്‍ലിങ് എന്ന സിനിമയുമായി ബന്ധപ്പെട്ട് നടത്തിയ പ്രസ് മീറ്റിങ്ങിനിടെയാണ് ചിത്രം വീണ്ടും ചർച്ചയാകുന്നത്. സംഗീത സംവിധായകന്‍ ഷാന്‍ റഹ്മാനോട് മാദ്ധ്യമ പ്രവര്‍ത്തകര്‍ അടി കപ്യാരെ കൂട്ടമണിയുടെ രണ്ടാം ഭാഗത്തെ കുറിച്ച് ചോദിച്ചിരുന്നു.
ഈ വര്‍ഷമാണോ അടുത്ത വര്‍ഷമാണോ സിനിമ ചെയ്യുന്നതെന്ന ചർച്ചയിലാണെന്നാണ് ഷാന്‍ പറഞ്ഞത്. ചിത്രത്തില്‍ അഭിനയിക്കുന്നതിന് വേണ്ടി ശരീരഭാരം കുറക്കണെമെന്ന് അടുത്തിടെ ധ്യാന്‍ ശ്രീനിവാസനോട് പറഞ്ഞിരുന്നു. അതിന് വേണ്ടിയെങ്കിലും അവന് ശരീരമൊന്ന് കുറക്കട്ടെയെന്നും മെലിഞ്ഞാല്‍ അവന് കൊള്ളാമെന്നും ഷാന്‍ റഹ്മാന്‍ മാദ്ധ്യമ പ്രവര്‍ത്തകരോട് പറഞ്ഞു.
