തിരുവനന്തപുരം: സിപിഎം നേതാവ് എളമരം കരീമിനെ വിമർശിച്ചതിന്റെ പേരിൽ ഏഷ്യാനെറ്റ് ന്യൂസ് വാർത്ത അവതാരകൻ വിനു വി ജോണിനെതിരെ കേസെടുത്തതിൽ സംസ്ഥാന സർക്കാരിനെ വിമർശിച്ച് ബിജെപി സംസ്ഥാന അദ്ധ്യക്ഷൻ കെ. സുരേന്ദ്രൻ. ബിബിസി ഡോക്യുമെന്ററി വിവാദത്തിൽ മാദ്ധ്യമ സ്വാതന്ത്ര്യത്തിന് വേണ്ടി വാതോരാതെ സംസാരിച്ച മുഖ്യമന്ത്രി പിണറായി വിജയൻ കേരളത്തിൽ തനിക്ക് നേരെ ചോദ്യം ചോദിക്കുന്ന മാദ്ധ്യമപ്രവർത്തകരെ വായടപ്പിക്കുകയാണെന്ന് സുരേന്ദ്രൻ പരിഹസിച്ചു.
മാദ്ധ്യമ സ്വാതന്ത്ര്യത്തിനെതിരായ കടന്നുകയറ്റമാണ് കേരളത്തിൽ നടക്കുന്നതെന്നും ബിജെപി സംസ്ഥാന അദ്ധ്യക്ഷൻ പറഞ്ഞു. ലോകത്താകെ കമ്മ്യൂണിസ്റ്റുകാർക്ക് മാദ്ധ്യമങ്ങളോടുള്ള സമീപനം തന്നെയാണ് വിനു വി ജോണിന്റെ കാര്യത്തിലും കാണുന്നത്. മുഖ്യമന്ത്രിയുടെ യാത്രയുടെ പേരിൽ പൗരാവകാശങ്ങളെ പോലും ചവിട്ടിമെതിക്കുന്ന സർക്കാർ മാദ്ധ്യമവേട്ട നടത്തി എതിർ ശബ്ദങ്ങളെ അടിച്ചമർത്തുകയാണ്. ഈ ഫാസിസ്റ്റ് നടപടി സർക്കാർ അവസാനിപ്പിച്ചില്ലെങ്കിൽ ശക്തമായ പ്രതിഷേധങ്ങളുണ്ടാകുമെന്നും കെ.സുരേന്ദ്രൻ പറഞ്ഞു.
ചാനൽ ചർച്ചയിൽ സിപിഎം നേതാവ് എളമരം കരീമിനെ വിനു വി ജോൺ വിമർശിച്ചതായിരുന്നു പ്രശ്നങ്ങൾക്ക് ആധാരം. ട്രേഡ് യൂണിയനുകൾ നടത്തിയ സമരത്തിൽ കേരളത്തിന്റെ വിവിധ ഭാഗങ്ങളിൽ സാധാരണക്കാർക്ക് നേരെ അക്രമസംഭവങ്ങൾ അരങ്ങേറിയിരുന്നു. ഇത് ചൂണ്ടിക്കാട്ടിയായിരുന്നു വിനുവിന്റെ വിമർശനം. പിന്നാലെ തിരുവനന്തപുരത്തെ ഏഷ്യനെറ്റ് സ്റ്റുഡിയോയിലേക്ക് സിഐടിയുവിന്റെ നേതൃത്വത്തിൽ ട്രേഡ് യൂണിയനുകൾ മാർച്ച് നടത്തി. ദിവസങ്ങൾക്ക് മുൻപ് പാസ്പോർട്ട് പുതുക്കാനായി അപേക്ഷിച്ചപ്പോഴാണ് തനിക്കെതിരെ കേസ് രജിസ്റ്റർ ചെയ്തിട്ടുണ്ടെന്ന വിവരം വിനു അറിയുന്നത്. പിന്നാലെ കഴിഞ്ഞ ദിവസം അദ്ദേഹത്തെ ചോദ്യം ചെയ്യാൻ കന്റോൺമെന്റ് സ്റ്റേഷനിലേക്ക് വിളിച്ചുവരുത്തുകയായിരുന്നു.
