ഇന്ത്യൻ സിനിമാ ചരിത്രത്തിൽ ഒരിക്കലും മറക്കാൻ കഴിയാത്ത മുഖമാണ് നടി ശ്രീദേവിയുടേത്. ജീവിച്ച് കൊതിതീരും മുമ്പേ സിനിമയുടെ സുവർണ വെളിച്ചത്തിൽ നിന്നും ആരാധകരുടെ ഹൃദയങ്ങളിൽ നൊമ്പരത്തിന്റെ കണികകൾ വാരി വിതറി നടന്നകന്നുപോയ അതുല്യ പ്രതിഭയുടെ അഞ്ചാം ചരമവാർഷികമാണ് ഇന്ന്.
ചരമ വാർഷികത്തിന് ദിവസങ്ങൾക്ക് മുമ്പ് തന്നെ വികാരഭരിതനായി ഭർത്താവ് ബോണി കപൂർ പങ്കുവെച്ച ചിത്രവും കുറിപ്പും ശ്രദ്ധേയമായിരുന്നു. ശ്രീദേവിയുടെ ഒരു പേയ്ന്റിങ്ങാണ് ബോണി കപൂർ ഇൻസ്റ്റാഗ്രാമിലൂടെ പങ്കുവെച്ചത്. ‘നീ ഞങ്ങളെ വിട്ടുപോയിട്ട് അഞ്ച് വർഷം പിന്നിടുന്നു. നിന്റെ സ്നേഹവും ഓർമകളുമാണ് ഞങ്ങളെ മുന്നോട്ട് നയിക്കുന്നത്. അത് എന്നും അങ്ങനെ തന്നെ നിലനിൽക്കും’. ഇതായിരുന്നു അദ്ദേഹത്തിന്റെ കുറിപ്പ്.
കഴിഞ്ഞ ദിവസങ്ങളിൽ ഇന്ത്യൻ സിനിമയിലെ നിരവധി താരങ്ങൾ ബോളി വുഡിന്റെ ആദ്യ ലേഡി സൂപ്പർ സ്റ്റാറിനെ അനുസ്മരിച്ച് സമൂഹമാദ്ധ്യമങ്ങളിൽ കുറിപ്പുകൾ പങ്കുവെച്ചിരുന്നു. ബോളിവുഡിൽ അഞ്ചു ദശാബ്ദത്തോളം തിളങ്ങി നിന്നിരുന്ന നടിയാണ് ശ്രീദേവി. 300 ലധികം സിനിമകളിൽ അഭിനയിച്ച നടി ബോളിവുഡിന്റെ ആദ്യ ലേഡി സൂപ്പർ സ്റ്റാറാണ്.
ഭർത്താവ് ബോണി കപൂർ നിർമ്മാണം ചെയ്ത മോം ആയിരുന്നു ശ്രീദേവിയുടെ അഭിനയിച്ച അവസാനത്ത ചിത്രം. 2018 ഫെബ്രുവരി 24 നായിരുന്നു ശ്രീദേവിയുടെ മരണം.
പ്രിയപ്പെട്ട നടിയുടെ വേർപാടിൽ ഇപ്പോഴും കുടുംബാംഗങ്ങളും ആരാധകരും വേദനിക്കുന്നുണ്ട്.
കുടുംബവുമായി ബന്ധപ്പെട്ട ഒരു ചടങ്ങിൽ പങ്കെടുക്കാൻ ദുബായിയിൽ പോയ ശ്രീദേവി അവിടത്തെ ഹോട്ടലിലെ ബാത്ത്റൂമിൽ കുഴഞ്ഞുവീണ് മരിക്കുകയായിരുന്നു.
തികച്ചും അപ്രതീക്ഷിതമായി സംഭവിച്ച മരണം ആരാധകർക്കും സഹപ്രവർത്തകർക്കും വിശ്വസിക്കാൻ കഴിഞ്ഞിരുന്നില്ല.
Comments