ഒരു നടി എന്ന നിലയിൽ സർവ ഉയരങ്ങളും കീഴടക്കാൻ സാധിച്ച താരമാണ് നയൻതാര. വിമർശനങ്ങളിൽ നിന്നും താരപദവിയിലേക്ക് ഉയർന്ന നടിയാണ് നയൻസ്. ഗ്ലാമറസ് റോളിന്റെ പേരിൽ വിമർശനങ്ങൾ നേരിട്ട താരം പിന്നിട് കുതിച്ചുയർന്നത് ലേഡി സൂപ്പർസ്റ്റാർ പദവിയിലേക്കാണ് ഉയർന്നത്.
മലയാളത്തിന്റെ എക്കാലത്തെയും ജനപ്രിയ ചിത്രമായ മനസിനക്കരയിലൂടെ ആരാധകരുടെ മനസിൽ കയറിപ്പറ്റിയ നടിയാണ് നയൻതാര. 2003-ൽ പുറത്തിറങ്ങിയ ചിത്രത്തിലൂടെ അഭിനയ ജീവിതം ആരംഭിച്ച നയൻസ് സിനിമയിൽ രണ്ട് പതിറ്റാണ്ട് പിന്നിട്ടിരിക്കുന്നു. ഈ വേളയിൽ ബോളിവുഡ് അരങ്ങേറ്റം കുറിക്കുക കൂടിയാണ് നടി. ഷാരൂഖ് ചിത്രം ജവാനിൽ നായികാവേഷത്തിലാണ് നയൻതാരയെത്തുന്നത്.
നയൻതാര എന്ന അഭിനേത്രിയേക്കാളുപരി ഒരു കുടുംബിനിയെ പ്രേക്ഷകർക്ക് മുന്നിൽ അവതരിപ്പിച്ച വർഷമായിരുന്നു 2022. ഏറെ നാളത്തെ പ്രണയത്തിനൊടുവിൽ സംവിധായകൻ വിഗ്നേഷ് ശിവൻ നയൻതാരയ്‌ക്ക് മിന്നു ചാർത്തിയത് കഴിഞ്ഞ വർഷമായിരുന്നു. മാസങ്ങൾക്കിപ്പുറം ഇരുവരും ഇരട്ടക്കുട്ടികളായ ആൺമക്കളുടെ മാതാപിതാക്കളുമായി. ഉയിരും ഉലകവും ചേർന്നതാണ് ഇരുവരും ഇപ്പോഴത്തെ ജീവിതം.
കുഞ്ഞുങ്ങളെ നയൻതാര കണ്ണിലെ കൃഷ്ണമണി പോലെയാണ് പരിപാലിക്കുന്നത് എന്ന് വിഗ്നേഷ് പറഞ്ഞിട്ടുണ്ട്. കുട്ടികൾ പിറന്നതിൽ പിന്നെ അവർ ചുംബിക്കും എന്നതിനാൽ നയൻതാര മേക്കപ്പ് പോലും മുഖത്തിടാറില്ല എന്ന് വിക്കി ഇൻസ്റ്റഗ്രാം പോസ്റ്റിൽ രേഖപ്പെടുത്തിയിരുന്നു.
മക്കൾക്കും കുടുംബത്തിനുമായി നയൻസ് സിനിമ വിടുന്നതായുള്ള റിപ്പോർട്ടുകളാണ് ഇപ്പോൾ പുറത്തുവരുന്നത്. മക്കളുടെ വളർച്ചയിസ് അമ്മയുടെ പങ്ക് വളരെ വലുതാണെന്നും അതിനാൽ സിനിമ ജീവിതത്തിന് ഫുൾസ്റ്റോപ്പ് ഇടുമെന്നാണ് പുറത്തുവരുന്ന വാർത്തകൾ. എന്നാൽ ഇത് സംബന്ധിച്ച് നയൻതാരയോ വിഗ്നേഷ് ശിവനോ ഇരുവരുടേയും വക്താക്കളോ പ്രതികരിച്ചിട്ടില്ല.
