ഇറ്റാനഗർ : വർഷങ്ങളുടെ കാത്തിരിപ്പിന് വിരാമമിട്ട് അരുണാചലിലെ താലിയിൽ റോഡ് പണി പൂർത്തിയായി. സ്വാതന്ത്രത്തിന് ശേഷം ഇതാദ്യമായാണ് അരുണാചൽപ്രദേശിലെ യാങ്ടെ-താലി മേഖലയിൽ റോഡ് സൗകര്യം എത്തുന്നത്. 46-ാമത് ന്യുകോം യുല്ലോയുടെ ഭാഗമായി സംഘടിപ്പിച്ച ആഘോഷ പരിപാടിയിൽ അരുണാചൽ പ്രദേശ് മുഖ്യമന്ത്രി പേമ ഖണ്ഡു പങ്കെടുത്തു. റോഡ് മാർഗം താലി പ്രദേശത്ത് എത്തുന്ന ആദ്യ മുഖ്യമന്ത്രിയാണ് പേമ ഖണ്ഡു. 2017 -ൽ പ്രദേശം സന്ദർശിക്കുന്ന സമയം താലിയിൽ റോഡ് സൗകര്യം ഉറപ്പാക്കുമെന്ന് അദ്ദേഹം ജനങ്ങൾക്ക് വാക്ക് നൽകിയിരുന്നു. ആ വാക്കാണ് ഇപ്പോൾ പാലിക്കപ്പെട്ടത്.
ചരിത്രപരവും സുപ്രധാനവുമായ ഈ സന്ദർഭത്തിൽ പങ്ക് ചേരാൻ കഴിഞ്ഞതിൽ താൻ അഭിമാനിക്കുന്നു. 50 കിലോമീറ്റർ പിഎംജിഎസ് വൈ റോഡ് ഈ വർഷത്തോടെ പൂർത്തിയാക്കും, ജനങ്ങളുടെ അടിസ്ഥാന സൗകര്യങ്ങൾ വികസിപ്പിക്കാൻ തന്റെ സർക്കാർ പ്രതിജ്ഞാബദ്ധരാണ്, അതിനായി അക്ഷീണം പ്രയത്നിക്കുമെന്നും 46-ാമത് ന്യുകോം യുല്ലോ ആഘോഷത്തിൽ സംസാരിക്കുകയായിരുന്നു അദ്ദേഹം.
സിറോ, ഇറ്റാനഗർ തുടങ്ങിയ മറ്റ് നഗരങ്ങളിലേക്ക് കുടിയേറിയ താലി പ്രദേശത്തെ ജനങ്ങളോട് സ്വന്തം ഗ്രാമങ്ങളിൽ തിരിച്ചെത്താൻ അദ്ദേഹം ആഹ്വാനം ചെയ്തു. കൂടാതെ, യാങ്ടെയിൽ നിന്ന് താലിയിലേക്കുള്ള പാതയിലെ കുമേ നദിക്ക് കുറുകെ പുനർനിർമിച്ച സ്റ്റീൽ-ആർച്ച് പാലവും മുഖ്യമന്ത്രി ജനങ്ങൾക്ക് സമർപ്പിച്ചു.
അരുണാചൽപ്രദേശിലെ നൈഷി ഗോത്രക്കാർ പ്രപഞ്ച ദേവതകളെ ആരാധിക്കുന്ന പരമ്പരാഗത ഉത്സവമാണ് ന്യോകം. ‘ന്യോകം’ എന്ന പേര് രണ്ട് പദങ്ങളിൽ നിന്നാണ് ഉരുത്തിരിഞ്ഞത്. ‘ന്യോക്ക്’ എന്നാൽ ‘ഭൂമിയും ‘കം’ എന്നാൽ കൂട്ടായ്മ എന്നുമാണ് അർത്ഥം.
Comments