ചെന്നൈ : ദേശീയ വനിതാ കമ്മീഷൻ അംഗമായി ചുമതലയേറ്റ് ഖുശ്ബു സുന്ദർ. തന്നെ വിശ്വസാമർപ്പിച്ച് ചുമലതയേൽപ്പിച്ചതിൽ പ്രധാനമന്ത്രി നരേന്ദ്രമോദിയോട് ഖുശ്ബു നന്ദി അറിയിച്ചു. സ്ത്രീകളുടെ അവകാശങ്ങൾ സംരക്ഷിക്കാനുള്ള പ്രവർത്തനങ്ങൾ ശക്തമായി തുടരുമെന്ന് അവർ വ്യക്തമാക്കി.
സിനിമാ താരവും സാമൂഹ്യ പ്രവർത്തകയുമാണ് ഖുശ്ബു. വനിതാ കമ്മീഷൻ തസ്തികയിൽ മൂന്ന് വർഷത്തേക്കാണ് നിയമനം അല്ലെങ്കിൽ മറ്റ് ഉത്തരവുകൾ വരുന്നത് വരയൊയിരിക്കും. നിലവിലെ ബിജെപി ദേശീയ നിർവാഹക സമിതി അംഗമാണ് ഖുശ്ബു.കഴിഞ്ഞ ദിവസമാണ് വനിതാ ശിശുവികസന മന്ത്രാലയം ഉത്തരവ് നൽകിയത്. ഝാർഖണ്ഡിൽ നിന്നുള്ള മമതാ കുമാരി, മേഘാലയിൽ നിന്നുള്ള അഭിഭാഷക ദലിന ഖോങ്ദുപ് എന്നിവരെയും കമ്മീഷൻ അംഗങ്ങളായി നാമനിർദ്ദേശം ചെയ്തിട്ടുണ്ട്.
ദീർഘകാല സിനിമാ അഭിനയത്തിന് ശേഷം 2010-ലാണ് ഖുശ്ബു രാഷ്ട്രീയത്തിൽ പ്രവേശിക്കുന്നത്. ഡിഎംകെയിലായിരുന്നു ആദ്യ പ്രവർത്തനം. തുടർന്ന് നാല് വർഷത്തോളം പാർട്ടിയിൽ സജീവ സാന്നിധ്യമായിരുന്നു. അതിനുശേഷം കോൺഗ്രസിന് വേണ്ടിയും ഖുശ്ബു പ്രവർത്തിച്ചിരുന്നു. ആറ് വർഷത്തെ പ്രവർത്തനത്തിന് പിന്നാലെ 2020 ഒക്ടോബർ 12-ന് ബിജെപിയിൽ പ്രവേശിക്കുകയായിരുന്നു. 2021-ൽ തമിഴ്നാട്ടിൽ തിരഞ്ഞെടുപ്പിൽ മത്സരിച്ചിരുന്നു.
Comments