ഭോപാൽ: ബോർഡർ ഗാവസ്കർ ടെസ്റ്റ് പരമ്പരയിലെ മൂന്നാം മത്സരത്തിലും ഇന്ത്യൻ താരങ്ങൾക്ക് ചരിത്ര നേട്ടം. ഓസ്ട്രേലിയയുടെ നാലുവിക്കറ്റുകളും നേടിയ ഓൾ റൗണ്ടർ രവീന്ദ്ര ജഡേജയാണ് ഇന്ത്യൻ ബൗളിങ് നിരയിൽ ഇന്ന് തിളങ്ങിയത്.
ഓസ്ട്രേലിയയ്ക്കെതിരായ പ്രകടനത്തോടെ അന്താരാഷ്ട്ര ക്രിക്കറ്റിൽ ജഡേജ 500 വിക്കറ്റുകൾ നേടി. മറ്റൊരു അപൂർവ്വനേട്ടവും താരം സ്വന്തമാക്കിയിരിക്കുകയാണ്. അന്താരാഷ്ട്ര ക്രിക്കറ്റിൽ 500 വിക്കറ്റുകളും 5000 റൺസും തികയ്ക്കുന്ന താരങ്ങളുടെ പട്ടികയിൽ ജഡേജയും ഇടംപിടിച്ചിരിക്കുകയാണ്. ഈ നേട്ടം കരസ്ഥമാക്കുന്ന രണ്ടാമത്തെ ഇന്ത്യൻ താരമാണ് ജഡേജ. ഇന്ത്യൻ ക്രിക്കറ്റ് ഇതിഹാസം കപിൽ ദേവാണ് ഇതിന് മുമ്പ് ഈ നേട്ടം സ്വന്തമാക്കിയത്.
ഓസ്ട്രേലിയൻ ഓപ്പണർ ട്രാവിസ് ഹെഡിന്റെ വിക്കറ്റെടുത്താണ് ജഡേജ ഈ നേട്ടം സ്വന്തമാക്കിയത്. 298 അന്താരാഷ്ട്ര മത്സരങ്ങളിൽ നിന്ന് 5527 റൺസാണ് ജഡേജയ്ക്കുള്ളത്. മൂന്ന് സെഞ്ചുറികളും 31 അർധ സെഞ്ചുറികളുമുണ്ട്. 298 മത്സരങ്ങളിൽ നിന്ന് 503 വിക്കറ്റുകളാണ് ഇന്ത്യൻ ഓൾ റൗണ്ടർക്കുള്ളത്. കപിൽ ദേവിന് 9031 റൺസും 687 വിക്കറ്റുകളുടെ റെക്കോർഡുമാണുള്ളത്.
