രജനികാന്തിന്റെ 169-ാമത് ചിത്രമായ ജയിലർ ഏറെ പ്രതീക്ഷയോടെയാണ് ആരാധകർ കാത്തിരിക്കുന്നത്. ഇപ്പോഴിതാ, ആരാധകരുടെ ആവേശം ഇരട്ടിയാക്കി സ്റ്റൈൽമന്നന്റെ 170-ാം ചിത്രവും പ്രഖ്യാപിച്ചിരിക്കുകയാണ്. സൂര്യയെ നായകനായി 2021-ൽ പുറത്തിറങ്ങിയ ജയ് ഭീം സംവിധാനം ചെയ്ത ടി ജെ ജ്ഞാനവേലനാണ് രജനികാന്ത് ചിത്രം ഒരുക്കുന്നത്.
மகிழ்வான தருணம்… புதிய பயணம் இனிதே ஆரம்பம்…#தலைவர்170 #Thalaivar170 https://t.co/sn1xc5M69r
— Gnanavel (@tjgnan) March 2, 2023
ലൈക പ്രൊഡക്ഷൻസാണ് തലൈവർ 170 പുറത്തിറക്കുന്നത്. നിലവിൽ തന്റെ 169-ാമത്തെ ചിത്രമായ ജയിലറിന്റെ തിരക്കിലാണ് രജനികാന്ത്. ലൈക പ്രൊഡക്ഷൻസ് ചെയർമാൻ സുബാസ്‌കരന്റെ ജന്മദിനത്തിലാണ് രജനികാന്തിന്റെ പുതിയ ചിത്രത്തെക്കുറിച്ചുള്ള പ്രഖ്യാപനം. ”സൂപ്പർസ്റ്റാർ രജനികാന്തിന്റെ 170മത് ചിത്രം പ്രഖ്യാപിക്കുന്നതിൽ ഞങ്ങൾക്ക് അഭിമാനമുണ്ട്. നിരൂപക പ്രശംസ പിടിച്ചുപറ്റിയ ജയ് ഭീം എന്ന് ചിത്രത്തിന്റെ സംവിധായകനാണ് തലൈവർ-170 ചെയുന്നത്. സംഗീതം ഒരുക്കുന്നത് റോക്ക്സ്റ്റാർ അനിരുദ്ധ് രവിചന്ദർ ആണ്. ”
ജയ് ഭീമിന് ശേഷം ജ്ഞാനവേലിന്റെ രണ്ടാമത്തെ പ്രൊജക്ടാണിത്. ഇതുവരെ പേരിട്ടിട്ടില്ലാത്ത ചിത്രം 2024ൽ റിലീസ് ചെയ്യാനാണ് അണിയറ പ്രവർത്തകരുടെ ശ്രമം. അതേസമയം, നെൽസൺ ദിലീപ്കുമാർ സംവിധാനം ചെയ്യുന്ന ജയിലറിന്റെ ചിത്രീകരണ തിരക്കിലാണ് രജനികാന്ത്. ഈ വർഷം അവസാനം ജയിലർ പുറത്തിറങ്ങും.
മോഹൻലാൽ അതിഥി വേഷത്തിലെത്തുന്നു എന്നതാണ് ജയിലറിന്റെ മറ്റൊരു സവിശേഷത. ചിത്രത്തിൽ രജനികാന്തും മോഹൻലാലും ഒന്നിക്കുന്ന ഒരു മാസ് ഫൈറ്റ് സീനും ഉണ്ട്. സിനിമയുടെ ഭൂരിഭാഗവും ജയിലിനുള്ളിലാണ് ചിത്രീകരിച്ചിരിക്കുന്നത്. സൺ ഫിലിംസിന്റെ ബാനറിൽ കലാനിധി മാരനാണ് ജയിലർ നിർമ്മിച്ചിരിക്കുന്നത്. കന്നഡ സൂപ്പർ സ്റ്റാർ ശിവ രാജ്കുമാർ ഈ ചിത്രത്തിലൂടെ തമിഴിൽ അരങ്ങേറ്റം കുറിക്കുന്നു. യോഗി ബാബു, തൃഷ കൃഷ്ണൻ, തമന്ന ഭാട്ടിയ, ജാക്കി ഷ്റോഫ്, സുനിൽ എന്നിവരും ഇതിൽ പ്രധാന കഥാപാത്രങ്ങളെ അവതരിപ്പിക്കുന്നു. പേട്ടയ്‌ക്കും ദർബാറിനും ശേഷം മൂന്നാമത്തെതവണയാണ് അനിരുദ്ധ് രവിചന്ദർ സ്റ്റൈൽമന്നന് സംഗീതമൊരുക്കുന്നത്.
