റൊസാരിയോ: അർജന്റീന സൂപ്പർ താരം ലയണൽ മെസ്സിയുടെ ഭാര്യ ആന്റൊണെല്ല റക്കുസോയുടെ മാതാപിതാക്കളുടെ ഉടമസ്ഥതയിലുള്ള സൂപ്പർ മാർക്കറ്റിന് നേരേ വെടിവെയ്പ്പ്. കഴിഞ്ഞ ദിവസം രാത്രി ആയിരുന്നു സംഭവം. ബൈക്കിലെത്തിയ തോക്കുധാരികളായ രണ്ട് പേർ ചേർന്നാണ് വെടിവെയ്പ്പ് നടത്തിയതെന്നാണ് അന്താരാഷ്‌ട്ര മാധ്യമങ്ങൾ റിപ്പോർട്ട് ചെയ്യുന്നത്. സംഭവ ശേഷം മെസ്സിയെ ഭീഷണിപ്പെടുത്തിയുള്ള ഒരു സന്ദേശവും സംഘം അവിടെ ഉപേക്ഷിച്ചാണ് ശേഷമാണ് രക്ഷപ്പെട്ടത്.
‘മെസ്സി, ഞങ്ങൾ നിങ്ങൾക്കായി കാത്തിരിക്കുന്നു. ജാവ്കിന് നിങ്ങളെ സംരക്ഷിക്കാനാകില്ല.’ എന്നാണ് അക്രമികൾ ഉപേക്ഷിച്ച സന്ദേശത്തിൽ പറയുന്നത്. റൊസാരിയോയിലെ മേയറാണ് പാബ്ലോ ജാവ്കിൻ. നഗരത്തിൽ കുഴപ്പങ്ങൾ സൃഷ്ടിക്കുക എന്നതാണ് ആക്രമികളുടെ ലക്ഷ്യമെന്ന് ജാവ്കിൻ പ്രതികരിച്ചു. മെസ്സിയുടെ ജന്മനാടായ റൊസാരിയോയിലാണ് സൂപ്പർ മാർക്കറ്റ് സ്ഥിതി ചെയ്യുന്നത്.
സംഭവസമയത്ത് സൂപ്പർ മാർക്കറ്റ് അടഞ്ഞുകിടക്കുകയായിരുന്നു, ആളപായമില്ല. 14 തവണ അക്രമികൾ വെടിയുതിർത്തന്നും റിപ്പോർട്ടുകളുണ്ട്. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു.
