പ്രശസ്ത പിന്നണി ഗായകൻ ബെന്നി ദയാലിന് ഡ്രോൺ തട്ടി പരിക്ക്. ചെന്നൈ വിഐടിയിൽ ലൈവ് സംഗീത പരിപാടിക്കിടയിൽ ആണ് അപകടം സംഭവിച്ചത്. ക്യാമറ ഘടിപ്പിച്ച ഡ്രോൺ ബെന്നി ദയാലിന്റെ തലയുടെ പിന്നിൽ വന്നിടിക്കുകയായിരുന്നു. സ്റ്റേജിൽ പാട്ട് പാടുന്നതിനിടയിൽ ഡ്രോണിന്റെ ഫാൻ ലീഫ് കൊണ്ട് തലയ്ക്കും കൈവിരലുകൾക്കും പരിക്കേറ്റു. അപകടത്തിന്റെ വീഡിയോ ദൃശ്യങ്ങൾ പുറത്ത് വന്നിട്ടുണ്ട്. ബെന്നി ദയാൽ തലയിൽ കൈ ചേർത്തുകൊണ്ട് താഴേക്ക് ഇരിക്കുന്നത് വീഡിയോയിൽ ദൃശ്യമാണ്.
അപകടത്തെ തുടർന്ന് ബെന്നി ദയാൽ സംഘാടകരോട് മൂന്ന് നിർദേശങ്ങൾ പങ്കുവെച്ചു. പരിപാടി അവതരിപ്പിക്കുന്ന സമയത്ത് ഡ്രോൺ കലാകാരന്മാരുടെ അടുത്തേക്ക് പോകാതെ ശ്രദ്ധിക്കണം. കലാകാരന്റെയും ഡ്രോണിന്റെയും ചലനം ഏകോപിപ്പിക്കാനാവില്ല. ഡ്രോണുകൾ പ്രവർത്തിപ്പിക്കുന്ന സമയങ്ങളിൽ ഒരു വ്യക്തി ഇത് ശ്രദ്ധിക്കുവാൻ അവിടെയുണ്ടാവണം. സർട്ടിഫൈഡ് ഡ്രോൺ ഓപ്പറേറ്റർമാരെ മാത്രമാണ് ഉൾപ്പെടുത്തേണ്ടത്.
പരിപാടിയ്‌ക്ക് മുമ്പ് പ്രൊഫഷണൽ ഡ്രോൺ ഓപ്പറേറ്റർമാരെ ഉൾപ്പെടുത്തി ഒരു വ്യവസ്ഥയുണ്ടാക്കി കരാറുകളിൽ ചേർക്കണമെന്നും അദ്ദേഹം ഓർമ്മിപ്പിച്ചു.
സംഭവത്തെ കുറിച്ച് ബെന്നി ദയാൽ ഇൻസ്റ്റഗ്രാമിലൂടെ വീഡിയോ പങ്കുവെച്ചിരുന്നു. ആരാധകരുടെ ആശങ്കകൾക്കുള്ള മറുപടിയും നന്ദിയുമാണ് അദ്ദേഹം പങ്കുവെച്ചിരിക്കുന്ന വീഡിയോയിലുള്ളത്. ‘എന്താണ് സംഭവിച്ചതെന്നറിയാത്ത മിക്ക ആളുകൾക്കുമായി, ഡ്രോൺ ഫാനുകൾ എന്റെ തലയുടെ പിൻഭാഗത്ത് ഇടിക്കുകയായിരുന്നു. തലയുടെ പിൻഭാഗത്ത് ചതവും കൈയിലെ വിരലുകൾക്ക് ക്ഷതവും സംഭവിച്ചു. ഇപ്പോൾ എല്ലാം ശരിയായി വരുന്നു. നിങ്ങളുടെ എല്ലാ സ്‌നേഹത്തിനും നന്ദി. മാതാപിതാക്കൾ എനിക്കുവേണ്ടി നടത്തിയ പ്രാർത്ഥനകൾക്കും നന്ദി.’ ബെന്നി ദയാൽ പറഞ്ഞു.
ഇന്ത്യൻ സിനിമ പിന്നണി ഗാന രംഗത്തെ പ്രശസ്ത ഗായകനാണ് ബെന്നി ദയാൽ. ഹിന്ദി, തമിഴ്, തെലുങ്ക്, മലയാളം, കന്നഡ, ബംഗാളി, ഗുജറാത്തി, മറാത്തി ഭാഷകളിൽ ഗാനമാലപിച്ച് പ്രതിഭ തെളിയിച്ച കലാകാരനാണ് അദ്ദേഹം.
