ലക്നൗ: വാരണാസിയിൽ ദേശീയ ക്ഷയരോഗ നിർമാർജന പരിപാടി പ്രധാനമന്ത്രി നരേന്ദ്രമോദി ഉദ്ഘാടനം ചെയ്യും. 2025-ഓടെ ഇന്ത്യയിൽ ക്ഷയരോഗം പൂർണ്ണമായി ഇല്ലാതാക്കുക എന്നതാണ് പദ്ധതി ലക്ഷ്യമിടുന്നത്. ലോക ക്ഷയരോഗ ദിനമായ മാർച്ച് 24-നാണ് പരിപാടി സംഘടിപ്പിക്കുന്നത്.
ഉദ്ഘാടന സമ്മേളനത്തിന് ശേഷം സംസ്ഥാന ആരോഗ്യ മന്ത്രിമാർ കേന്ദ്ര ആരോഗ്യ കുടുംബക്ഷേമ മന്ത്രി മൻസുഖ് മാണ്ഡവ്യയുമായി കൂടിക്കാഴ്ച നടത്തും. ഉത്തർപ്രദേശ് മുഖ്യമന്ത്രി യോഗി ആദിത്യനാഥും സംസ്ഥാന ഗവർണറും ചടങ്ങിൽ പങ്കെടുക്കും. പരിപാടിയിൽ പങ്കെടുക്കുന്ന എല്ലാ മുഖ്യാതിഥികൾക്കും സൈറ്റ് സന്ദർശനവും ആസൂത്രണം ചെയ്യുന്നുണ്ട്. ഐക്യരാഷ്‌ട്രസഭയുടെ കീഴിൽ ജനീവ ആസ്ഥാനമായുള്ള സ്റ്റോപ്പ് ടിബി പാർട്ണർഷിപ്പിന്റെ ബോർഡ് മീറ്റിംഗും വാരാണസിയിൽ സംഘടിപ്പിക്കും.
മാർച്ച് 25-ന് ആരംഭിക്കുന്ന യോഗത്തിൽ നിരവധി രാജ്യങ്ങളിൽ നിന്നുള്ള ആരോഗ്യ മന്ത്രിമാർ പങ്കെടുക്കും. ക്ഷയരോഗം തടയാൻ പ്രധാനമന്ത്രി പുതിയ പദ്ധതികളും യോഗത്തിൽ പ്രഖ്യാപിക്കും. ഇതിനായി ടിബി രഹിത പഞ്ചായത്ത് എന്ന പേരിൽ ഒരു പുതിയ സംരംഭം ആവിഷ്‌കരിച്ചിട്ടുണ്ട്. നിലവിൽ ഇന്ത്യയിൽ ക്ഷയരോഗ ബാധിതരെ നിരീക്ഷിക്കുന്നത് ജില്ലാ- ബ്ലോക്ക് തലങ്ങളിൽ നിന്നാണ് ആരംഭിക്കുന്നത്. ഇത് ഗ്രാമഞ്ചായത്ത് തലത്തിൽനിന്ന് ആരംഭിക്കാനാണ് സർക്കാർ ലക്ഷ്യമിടുന്നത്.
Comments