അഹമ്മദാബാദ്: ബോർഡർ ഗവാസ്‌കർ ട്രോഫി പരമ്പരയുടെ അവസാന മത്സരത്തിൽ ഇരട്ട റെക്കോർഡുകൾ സ്വന്തമാക്കി രോഹിത് ശർമ്മ. രാജ്യാന്തര ക്രിക്കറ്റിൽ 17000 റൺസ് തികക്കുന്ന ആറാമത്തെ ഇന്ത്യൻ ബാറ്ററായി മാറിയിരിക്കുകയാണ് രോഹിത് ശർമ്മ. ടെസ്റ്റ് ക്രിക്കറ്റിൽ ഇന്ത്യയിൽ അതിവേഗം 2000 റൺസ് തികക്കുന്ന രണ്ടാമത്തെ ഇന്ത്യൻ ബാറ്ററെന്ന റെക്കോർഡും രോഹിത് ശർമ്മ സ്വന്തമാക്കിയിരിക്കുകയാണ്.
ലോകക്രിക്കറ്റിൽ 17000 റൺസ് എന്ന നേട്ടം സ്വന്തമാക്കുന്ന 28-ാമത്തെ താരമാണ് രോഹിത്. ഇന്ത്യൻ താരങ്ങളിൽ സച്ചിൻ ടെൻഡുൽക്കർ(34357), വിരാട് കോലി(25047), രാഹുൽ ദ്രാവിഡ്(24208), സൗരവ് ഗാംഗുലി(18575), എം എസ് ധോണി(17266), വീരേന്ദർ സെവാഗ്(17253 ) എന്നിവരാണ് രോഹിതിന് മുമ്പ് രാജ്യാന്തര ക്രിക്കറ്റിൽ 17000 റൺസ് തികച്ചിട്ടുള്ള ഇന്ത്യൻ ബാറ്റർമാർ.
ഇന്ത്യയിൽ കളിച്ച 36 ഇന്നിംഗ്സുകളിൽ നിന്നാണ് രോഹിത് 2000 റൺസ് തികച്ചത്. 33 ഇന്നിംഗ്സുകളിൽ 2000 റൺസ് തികച്ച മുൻ ഇന്ത്യൻ ബാറ്റർ മുഹമ്മദ് അസ്ഹറുദ്ദീനാണ് ഈ നേട്ടത്തിൽ രോഹിത്തിന്റെ മുൻഗാമി. രോഹിത്തിന്റെ സഹതാരം ചേതേശ്വർ പൂജാരയും ഇന്ത്യയിൽ 36 ഇന്നിംഗ്സുകളിൽ നിന്ന് തന്നെയാണ് 2000 റൺസ് തികച്ചത്. ഇവരെ കൂടാതെ സച്ചിൻ ടെൻഡുൽക്കർ(38 ഇന്നിംഗ്സ്), വീരേന്ദർ സെവാഗ്(39), വിരാട് കോലി(39), രാഹുൽ ദ്രാവിഡ്(41) എന്നിവരെല്ലാം ഇന്ത്യയിലെ പ്രകടനത്തിൽ രോഹിത്തിനെക്കാൾ പിന്നിലാണ്.
