പ്രതിസന്ധികളെ അതിജീവിച്ച് മുന്നോട്ട് പോകുക എന്നതാണ് ജീവിതം നമുക്ക് തരുന്ന പാഠം. ജീവിതത്തെ മുന്നോട്ട് നയിക്കുന്നത് ഒരുപക്ഷെ സ്വപ്നങ്ങളായിരിക്കാം. ഓരോ പുലരിയും ചിലപ്പോൾ അതിനുള്ള ആവേശത്തോടെയായിരിക്കാം നാം സ്വീകരിക്കുക. സ്വപ്നമെന്നത് കണ്ട് മറക്കേണ്ടതല്ല. ഒരു നാൾ സാക്ഷാത്കരിക്കപ്പെടേണ്ടതാണ്. അതിന് ഉറച്ച ആത്മവിശ്വാസവും നിശ്ചയദാർഢ്യവുമുണ്ട് എങ്കിൽ തടസ്സങ്ങളൊക്കെയും നിഷ്പ്രയാസം മറികടക്കും. തപ്സി ഉപാധ്യായ എന്ന പെൺകുട്ടിയുടെ ജീവിതം ഇതിന് ഒരു ഉത്തമ ഉദാഹരണമാണ്.
ബിടെക് പാനി പൂരി വാലി എന്നാണ് തപ്സി അറിയപ്പെടുന്നത്. ആർ യൂ ഹംഗ്രി എന്ന് ഇൻസ്റ്റഗ്രാമിൽ പോസ്റ്റ് ചെയ്ത വീഡിയോ വൈറലായിരുന്നു. റോയൽ ൻെഫീൽഡ് മോട്ടോർ ബൈക്കിൽ പാനി പൂരി സ്റ്റാളിട്ട് ഓട്ക്കുന്ന തപ്സിയെ വീഡിയോയിൽ കാണാവുന്നതാണ്. ഡൽഹിയിലെ തിലക് നഗറിലാണ് 21-കാരിയുടെ ഗോൾപ്പ സ്റ്റാൾ സ്ഥിതി ചെയ്യുന്നത്. ആവി കയറ്റിയ പാനി പൂരി, ഇംലി, ഖജൂർ, ശർക്കര എന്നിവ ഉപയോഗിച്ച് ഉണ്ടാക്കിയ ചട്ണി എന്നിവയെല്ലാം വീഡിയോയിലുണ്ട്.
ഇതുവരെ അഞ്ച് ദശലക്ഷം കാഴ്ചക്കാരെയാണ് വീഡിയോ സ്വന്തമാക്കിയിരിക്കുന്നത്. ബിടെക്കിൽ ബിരുദം പൂർത്തിയാക്കിയ ഉടൻ തന്നെ തപ്സി സ്വയം സംരംഭക എന്ന നിലയിൽ തന്റെ ഉപജീവനമാർഗം കണ്ടെത്തുകയായിരുന്നു. ഉയർന്ന ശമ്പളത്തിലുള്ള ജോലി വേണ്ടന്ന് വെച്ച് മനസ്സിന് ഇണങ്ങിയ ജോലിയിലേർപ്പെടുത്തി വിജയം കൈവരിച്ചവരുടെ കഥകൾ നമുക്ക് സുപരിചിതമാണ്. അത്തരത്തിലൊരു കഥയാണ് തപ്സിയിലൂടെയും ആവർത്തിക്കുന്നത്.
Comments