ഷംസീർ പറഞ്ഞതാണ് സത്യം, സിപിഎം തീരുമാനിച്ചാൽ ഷാഫി ഇനി നിയമസഭ കാണില്ല; ഷാഫി നിയമസഭയിൽ ഇരിക്കുന്നത് സിപിഎമ്മിന്റെ വോട്ടിൽ: അഡ്വ. പ്രകാശ് ബാബു

തിരുവനന്തപുരം: പാലക്കാട് മണ്ഡലത്തിൽ ഷാഫി പറമ്പിൽ ജയിച്ചത് സിപിഎം-കോൺഗ്രസ് അവിഹിത ബന്ധത്തിലൂടെയാണെന്ന് ബിജെപി സംസ്ഥാന സെക്രട്ടറി അഡ്വ. പ്രകാശ് ബാബു. നിയമസഭയിൽ സ്പീക്കർ എ.എൻ. ഷംസീർ അത് വിളിച്ചു പറഞ്ഞു. ബിജെപിയെ തോൽപ്പിക്കാൻ വേണ്ടി സിപിഎമ്മുകാർ തങ്ങളുടെ വോട്ട് ഷാഫിക്ക് നൽകി. ജനങ്ങളുടെ മുന്നിൽ കീരിയും പാമ്പും പോലെ കടിച്ചുകീറി വാക്പോരാട്ടം നടത്തി കൊണ്ട് പ്രബുദ്ധ കേരളത്തെ സിപിഎമ്മും കോൺഗ്രസും വഞ്ചിക്കുകയാണെന്ന് പ്രകാശ് ബാബു തുറന്നടിച്ചു. സിപിഎം-കോൺ​ഗ്രസ് അവിശുദ്ധ കൂട്ടുക്കെട്ട് വ്യക്തമാക്കാൻ 2011-ലെയും 2021-ലെയും പാലക്കാട്ടെ വോട്ടിംഗ് ശതമാനവും അദ്ദേഹം ഫേയ്സ്ബുക്കിൽ പങ്കുവെച്ചു.

പാലക്കാട് ഷാഫി ജയിച്ചത് സിപിഎം-കോൺഗ്രസ് അവിഹിത ബന്ധത്തിലെന്ന് കണക്കുകൾ പറയും. ഇതു പറയാൻ ഏറ്റവും യോഗ്യർ സിപിഎമ്മും ഷംസീറും തന്നെയാണ്. ത്രിപുര, ബംഗാൾ മോഡലിൽ വീണ്ടും ഒരുമിച്ചു ബിജെപിയെ തോൽപ്പിക്കാൻ ഇറങ്ങേണ്ടവരാണ്. മോദിയും ഷായും പിണറായിയും ഒരുമിച്ച് ശ്രമിച്ചിട്ടും താൻ ജയിച്ചു എന്നാണ് ഷാഫിയുടെ മറുപടി. ഷാഫി പറമ്പിൽ നിയമസഭയിൽ ഇരിക്കുന്നത്, പാലക്കാട് നിയമസഭ മണ്ഡലത്തിലെ മൂന്ന് പഞ്ചായത്തുകളിൽ ത്രാസ് ഒപ്പിച്ച് അളന്നു മുറിച്ച വോട്ട് സിപിഎമ്മുകാർ ബിജെപിയെ തോൽപ്പിക്കാൻ വേണ്ടി ഷാഫിയുടെ പെട്ടിയിൽ ഇട്ടതുകൊണ്ട് തന്നെയാണെന്ന് വോട്ടിന്റെ കണക്കുകൾ പറയും. 2021-ൽ പാലക്കാട് നിയമസഭ മണ്ഡലത്തിൽ മെട്രോമാൻ ഇ.ശ്രീധരൻ തോൽക്കുന്നത് 4000-ന് താഴെ വോട്ടിനാണ്.

2021 പാലക്കാട് വോട്ടിംഗ്: ഷാഫി പറമ്പിൽ (UDF): 38.06%, ഇ.ശ്രീധരൻ(BJP): 35. 34%, സി പി.പ്രമോദ് (CPM): 25%
2016 പാലക്കാട് വോട്ട് നില: ഷാഫി പറമ്പിൽ (UDF): 41.71%, ശോഭ സുരേന്ദ്രൻ (BJP):29.08%, എൻ.എൻ.കൃഷ്ണദാസ് (CPM):28.7%
2011 പാലക്കാട് വോട്ട് നില: UDF: 42%, CPM :35%, BJP :19 %. ഇനി ജനങ്ങളുടെ മുന്നിൽ കീരിയും പാമ്പും പോലെ കടിച്ചുകീറി വാക്പോരാട്ടം നടത്തി പ്രബുദ്ധ കേരളത്തെ പതിവുപോലെ വഞ്ചിക്കുന്ന സിപിഎം-കോൺഗ്രസ് നേതാക്കൾ കണക്കുകളുടെ അടിസ്ഥാനത്തിൽ മറുപടി പറയണം. ഷാഫി പറമ്പിൽ ആരുടെ വോട്ട് വാങ്ങിയാണ് ജയിച്ചത്?

സിപിഎമ്മിന്റെ 3% വോട്ട് ആർക്കാണ് ലഭിച്ചത്? സിപിഎം ശക്തികേന്ദ്രമായ രണ്ട് പഞ്ചായത്തിലെ( കണ്ണാടി, പിരായരി) വോട്ട് കുത്തനെ കുറഞ്ഞത് ആരുടെ പെട്ടിയിൽ വീണതു കൊണ്ടാണ്? ബിജെപി വോട്ട് 29% ശതമാനത്തിൽ നിന്നും 35% ശതമാനത്തിൽ എത്തിയപ്പോൾ പിണറായി തരംഗം കേരളത്തിൽ ആഞ്ഞുവീശിയപ്പോഴും പാലക്കാട് വോട്ട് കൂടിയില്ല എന്ന് മാത്രമല്ല എൻ.എൻ.കൃഷ്ണദാസ് 2016-ൽ നേടിയ 28.7% വോട്ടിൽ നിന്ന് 2021-ൽ എങ്ങനെ 25% ത്തിലേക്ക് കൂപ്പുകുത്തി. ഇത് തന്നെയാ എ.എൻ.ഷംസീർ പറഞ്ഞ സത്യം. അവരങ്ങ് തീരുമാനിച്ചാൽ ഷാഫി ഇനി നിയമസഭ കാണില്ല എന്ന്. പിന്നെ ഷാഫിയുടെ ആഗോള ജനപിന്തുണ കൊണ്ടാണല്ലോ 5 കൊല്ലം എംഎൽഎ ആയ ശേഷം നേരിട്ട തിരഞ്ഞെടുപ്പിൽ 3500 വോട്ട് കുറഞ്ഞ് കിട്ടിയത്.