തിരുവനന്തപുരം : “പാവപ്പെട്ടവർക്കു നീതി ഉറപ്പാക്കൂ, ഞങ്ങളെ സംരക്ഷിക്കു” എന്ന പ്ലക്കാർഡും കയ്യിലേന്തി സെക്രട്ടറിയേറ്റിന് മുന്നിൽ ഒറ്റയാൾ സമരവുമായി നടൻ ഭീമൻ രഘു. താരം തന്നെ സംവിധാനം ചെയ്തു നായകനായി മാർച്ച് 17 ന് തിയറ്ററിൽ റിലീസ് ചെയ്യുന്ന പുതിയ സിനിമയുടെ പ്രമോഷന്റെ ഭാഗമായാണ് സെക്രട്ടറിയേറ്റിന് മുന്നിൽ എത്തിയത്. ‘ചാണ’ എന്നാണ് പുതിയ ചിത്രത്തിന്റെ പേര്.
കൈയിൽ പഴയ ചാണയും കീറിയ സഞ്ചിയും പിടിച്ച്, കൈലി മുണ്ടുമിട്ടാണ് രഘുവെത്തിയത്. ആദ്യമൊന്നും എന്താണ് സംഭവമെന്ന് ചുറ്റുമുള്ളവർക്കൊന്നും മനസിലായില്ല. ഇതോടെ പുതിയ ചിത്രമായ ‘ചാണ’യുടെ പ്രമോഷനുവേണ്ടിയാണ് എത്തിയതെന്ന് അദ്ദേഹം തന്നെ പറയുകയായിരുന്നു. തുടർന്ന് പൊലീസുകാരടക്കം നിരവധിപേരാണ് നടനൊപ്പം സെൽഫിയെടുത്തത്.
വേറിട്ടൊരു സമര മാർഗത്തിലൂടെ തന്റെ സിനിമയെ ജനങ്ങളിലേക്ക് എത്തിക്കാനാണ് ശ്രമിച്ചതെന്ന് ഭീമൻ രഘു പറയുന്നു. ‘സാധാരണ നമ്മളുടെ കൂട്ടത്തിലുള്ള ഒരു ആർട്ടിസ്റ്റുകളും ഇതുപോലൊരു പ്രമോഷനുവേണ്ടി ഇറങ്ങില്ല. എന്നാൽ ജനങ്ങളുമായി ഇൻട്രാക്ട് ചെയ്യണം. എങ്കിൽ മാത്രമേ പടത്തിന് ഗുണം ലഭിക്കുകയുള്ളു. ഹീറോയിസത്തിലേക്ക് ഇതുവരെ വരാൻ സാധിച്ചിട്ടില്ല. ഇപ്പോൾ ഒരു ഹീറോയിസത്തിലേക്ക് വന്നപ്പോൾ എനിക്ക് തന്നെ തോന്നി ഞാൻ ചെയ്തിരിക്കുന്ന കഥാപാത്രം വളരെ രസകരമാണെന്ന്. അതിനാൽ മാത്രമാണ് ഞാൻ ഈ കഥ തിരഞ്ഞെടുത്ത്. ഞാൻ തന്നെ സംവിധാനം ചെയ്ത് ജനങ്ങളുടെ ഇടയിലേക്കിറക്കാൻ തീരുമാനിച്ചത്. അത് വളരെ മനോഹരമായി ചെയ്തിട്ടുമുണ്ട്. മൂന്ന് അവാർഡുകൾ ഞങ്ങളാണ് വാങ്ങിച്ചത്. പടം റിലീസ് ചെയ്യുന്നതിന് മുമ്പ് തന്നെ മൂന്ന് അവാർഡുകൾ കിട്ടിയതുതന്നെ വലിയ കാര്യം. ജനങ്ങളുമായി ഇൻട്രാക്ട് ചെയ്യണമെന്നത് എന്റെ വലിയ ആഗ്രഹമാണ്. അതുകാരണമാണ് ഞാൻ ഇറങ്ങിയത്.’- ഭീമൻ രഘു പറഞ്ഞു.
