മലയാളികളുടെ സ്വകാര്യ അഹങ്കാരമായ മെഗാസ്റ്റാറാണ് മമ്മൂട്ടി. വിവിധ തലമുറയിൽപ്പെട്ടവരുടെ സ്നേഹം ഒരുപോലെ സ്വായത്തമാക്കാൻ മമ്മൂട്ടിയെന്ന മഹാനടന് കഴിഞ്ഞിട്ടുണ്ട്. ദശാബ്ദങ്ങൾ നീണ്ട അദ്ദേഹത്തിന്റെ അഭിനയ ജീവിതം പുതുതലമുറയിലെ കലാകാരൻമാർക്ക് വലിയ പ്രചോദനവുമാണ്. സോഷ്യൽ മീഡിയയിലൂടെ പങ്കുവക്കപ്പെടുന്ന നടന്റെ ചിത്രങ്ങൾക്കും വീഡിയോകൾക്കും വലിയ പ്രേക്ഷകപ്രീതിയാണ് ലഭിക്കാറുള്ളത്. ഇപ്പോഴിതാ രമേഷ് പിഷാരടി പങ്കുവച്ച അദ്ദേഹത്തിന്റെ ചിത്രവും സമൂഹമാദ്ധ്യമങ്ങളിൽ ശ്രദ്ധേയമാവുകയാണ്.
കേന്ദ്ര വാർത്താവിതരണ പ്രക്ഷേപണ മന്ത്രി അനുരാഗ് ഠാക്കൂറിനോടൊപ്പം മമ്മൂട്ടിയിരിക്കുന്ന ചിത്രമാണ് നടനും ടെലിവിഷൻ താരവുമായ രമേഷ് പിഷാരടി ഫേസ്ബുക്കിൽ പങ്കുവച്ചത്. ജീവിത്തിലെ ചില നിമിഷങ്ങൾ അസാധാരണമാണ് എന്ന അടിക്കുറിപ്പോടെ രണ്ട് ചിത്രങ്ങൾ പിഷാരടി പോസ്റ്റ് ചെയ്തിരുന്നു.
ആദ്യത്തെ ചിത്രത്തിൽ ബിസിസിഐ വൈസ് പ്രസിഡന്റും രാജ്യസഭാംഗവുമായ രാജീവ് ശുക്ല, കേന്ദ്രമന്ത്രി അനുരാഗ് ഠാക്കൂർ, മമ്മൂട്ടി, രമേഷ് പിഷാരടി, ജോൺ ബ്രിട്ടാസ് എംപി എന്നിവരാണുള്ളത്. രണ്ടാമത്തെ ചിത്രത്തിൽ അനുരാഗ് ഠാക്കൂറും മമ്മൂട്ടിയും പരസ്പരം നോക്കി പൊട്ടിച്ചിരിക്കുന്ന രംഗവും കാണാം. സിനിമാ താരങ്ങളും കേന്ദ്രമന്ത്രിയും എല്ലാം ചേർന്ന് നടത്തിയ കൂടിക്കാഴ്ചയെക്കുറിച്ചുള്ള കൂടുതൽ വിവരങ്ങൾ ലഭ്യമായിട്ടില്ലെങ്കിലും ഇതിന്റെ ചിത്രങ്ങൾ ഇതിനോടകം വൈറലായി കഴിഞ്ഞു.
Comments