കൊല്ലം: തിരുവനന്തപുരം നഗരസഭയുടെ സ്റ്റിക്കർ പതിച്ച വാഹനം റോഡിൽ മാലിന്യം തള്ളിയതിന് പിടിയിലായി. നഗരസഭയിലെ ഇറച്ചി മാലിന്യങ്ങളുമായി പോയ മിനി ലോറിയിൽ നിന്നും മാംസാവശിഷ്ടങ്ങൾ റോഡിലേക്ക് ഒഴുക്കുകയായിരുന്നു. വാഹനത്തെ കിലോമീറ്ററുകളോളം പിന്തുടർന്നതിന് പിന്നാലെയാണ് പോലീസിൽ ഏൽപ്പിക്കാൻ കഴിഞ്ഞത്. യത്രക്കാർ തടഞ്ഞ് നിർത്തി ആലപ്പുഴ മണ്ണാഞ്ചേരി പോലീസിൽ കൈമാറുകയായിരുന്നു.
കൊല്ലത്ത് നിന്നും കൊച്ചിയിലേക്കുള്ള യാത്രക്കിടയിൽ രണ്ട് യാത്രക്കാരാണ് മിനി ലോറിയിൽ നിന്നും ഇറച്ചി മാലിന്യമടങ്ങിയ ചോര ദേശീയപാതയിലേക്ക് ഒഴുക്കുന്നത് കണ്ടത്. വാഹനത്തെ പിന്തുടർന്ന ഇവർ മാരാരിക്കുളത്ത് വെച്ച് ലോറി തടഞ്ഞ് പോലീസിന് കൈമാറി.
മാലിന്യം റോഡിൽ തള്ളിയതിന് കേസെടുത്തതായി പോലീസ് പറഞ്ഞു. മാലിന്യം എങ്ങോട്ട് കൊണ്ടുപോവുകയായിരുന്നുവെന്ന് അന്വേഷിക്കുമെന്ന് പോലീസ് വ്യക്തമാക്കി. മാലിന്യ സംസ്കരണത്തിന് വേണ്ടി തിരുവനന്തപുരത്ത് നിന്ന് എടയാരിലേക്ക് കൊണ്ടുപോവുകയായിരുന്നു എന്നാണ് വാഹനത്തിന്റെ ഡ്രൈവർ പറഞ്ഞത്.
