എറണാകുളം: രണ്ടു ദിവസത്തെ ഔദ്യോഗിക സന്ദർശനത്തിനായി രാഷ്‌ട്രപതി ദ്രൗപദി മുർമു കേരളത്തിലെത്തി. കൊച്ചിയിലാണ് രാഷ്‌ട്രപതി വിമാനമിറങ്ങിയത്. ഇതാദ്യമായാണ് രാഷ്‌ട്രപതി ദ്രൗപദി മുർമു കേരളത്തിലെത്തുന്നത്.
സംസ്ഥാന ഗവർണർ ആരിഫ് മുഹമ്മദ് ഖാൻ, മുഖ്യമന്ത്രി പിണറായി വിജയൻ എന്നിവർ ചേർന്ന് കൊച്ചി വിമാനത്താവളത്തിൽ രാഷ്‌ട്രപതിയെ സ്വീകരിച്ചു. നാവികസേനയുടെ വിമാനവാഹിനിക്കപ്പലായ ഐഎൻഎസ് വിക്രാന്ത് സന്ദർശിച്ച ശേഷം നാവിക സേനയുടെ ഐഎൻഎസ് ദ്രോണാചാര്യയിലെ പരിപാടിയിലും രാഷ്‌ട്രപതി പങ്കെടുക്കും. ചടങ്ങിൽ ഐഎൻഎസ് ദ്രോണാചാര്യയ്‌ക്ക് രാഷ്ട്രപതിയുടെ ഉയർന്ന ബഹുമതിയായ ‘പ്രസിഡന്റ്‌സ് കളർ” ദ്രൗപദി മുർമു സമ്മാനിക്കും.
രാത്രി തിരുവനന്തപുരത്തേക്കു തിരിക്കുന്ന രാഷ്‌ട്രപതി 17-ന് രാവിലെ 9.30-ന് ഹെലികോപ്ടറിൽ കൊല്ലം വള്ളിക്കാവിൽ മാതാ അമൃതാനന്ദമയി മഠത്തിലേക്കും പോകും. തിരികെ തിരുവനന്തപുരത്തെത്തി കവടിയാർ ഉദയ് പാലസ് കൺവൻഷൻ സെന്ററിൽ നടക്കുന്ന കുടുംബശ്രീയുടെ പരിപാടിലും പങ്കെടുക്കും. ഉച്ചയ്‌ക്കു ലക്ഷദ്വീപിലേക്കു തിരിക്കും.
