സമൂഹമാദ്ധ്യമങ്ങളിൽ എപ്പോഴും ശ്രദ്ധിക്കപ്പെടുന്ന താരമാണ് നടൻ ടിനി ടോം. മിമിക്രി കലാകാരൻ എന്ന നിലയിലും ടെലിവിഷൻ പരിപാടികളിലെ അവതാരകൻ എന്ന നിലയിലും അദ്ദേഹം സമൂഹമാദ്ധ്യമങ്ങളിൽ നിറഞ്ഞു നിൽക്കുന്നുണ്ട്. സ്പോർട്സ് കാർ പ്രേമികളുടെ പ്രിയ വാഹനമായ മസ്താങ് ജിടി ടിനി ടോം സ്വന്തമാക്കി എന്നുള്ള വാർത്തയാണ് ഇപ്പോൾ സോഷ്യൽമീഡിയയിൽ നിറയുന്നത്. വാഹനത്തിനൊപ്പമുള്ള ടിനിയുടെ ചിത്രങ്ങളും വൈറലായി കഴിഞ്ഞു. ഇപ്പോഴിതാ, വാഹനം സ്വന്തമാക്കിയതിനെപ്പറ്റി പ്രതികരിച്ചിരിക്കുകയാണ് താരം.
ചിട്ടി പിടിച്ചാണ് കാർ സ്വന്തമാക്കിയതെന്ന് ഒരു അഭിമുഖത്തിൽ ടിനി ടോം പറയുന്നു. വാഹനങ്ങളോടുള്ള തന്റെ ഇഷ്ടവും ആഗ്രഹവും താരം ഇതിന് മുമ്പും അഭിമുഖങ്ങളിൽ പറഞ്ഞിട്ടുള്ളതാണ്. മാരുതി 800 മുതൽ പജേറോ സ്‌പോട്ട്, ബിഎംഡബ്ല്യു ഫൈവ് സീരീസ്, ഹോണ്ട ബ്രിയോ തുടങ്ങിയ വാഹനങ്ങൾ അദ്ദേഹത്തിന്റെ ഗ്യാരേജിൽ ഉണ്ട്. അമേരിക്കൻ വാഹന നിർമാതാക്കളായ ഫോർഡ് ഇന്ത്യയിൽ എത്തിച്ചിട്ടുള്ള സ്പോർട്സ് കാറായ മസ്താങ് സ്വന്തമാക്കിയതോടെ ചിലർ വിമർശനങ്ങളുമായി രംഗത്തു വന്നിരുന്നു. ഇതിനെപ്പറ്റിയാണ് ടിനി ടോം പ്രതികരിച്ചിരിക്കുന്നത്.
ഞാൻ കാറെടുത്തപ്പോൾ വേദനിപ്പിക്കണം എന്നാഗ്രഹിച്ച് ചിലർ കമന്റ് ചെയ്തു. ഇൻകം ടാക്സ് റെയ്ഡ് നടത്തണം എന്നെല്ലാം. എനിക്കിതൊന്നും കണ്ടാൽ വേദനിക്കില്ല. ഞാൻ ചിട്ടിയെല്ലാം പിടിച്ചാണ് ഒരു വണ്ടി എടുത്തത്. എന്റെ ഭാര്യ പറയും കാർ വാങ്ങിച്ച നേരം ഒരു ഫ്ലാറ്റോ സ്ഥലമോ വാങ്ങിച്ചിരുന്നെങ്കിൽ ഭാവിയിലേയ്‌ക്ക് ഗുണം ചെയ്തേനെ എന്ന്. പക്ഷെ നമ്മൾ ആഗ്രഹിക്കുക എന്നതാണ് പ്രധാനം. ഞാൻ സീറോ ബാലൻസിൽ നിന്നും ജീവിതം തുടങ്ങിയ ആളാണ്. എന്റെ വീട്ടിൽ കാശില്ലാഞ്ഞിട്ടല്ല. ചില കാരണങ്ങൾ കൊണ്ട് ഒരു ഒറ്റമുറി വാടക വീട്ടിലേയ്‌ക്ക് താമസം മാറി ജീവിക്കേണ്ടി വന്നൊരാളാണ് ഞാൻ’- എന്നാണ് ടിനി അഭിമുഖത്തിൽ പറഞ്ഞത്.
Comments