ബ്രഹ്മപുരം വിഷയത്തിൽ ബിജെപി പ്രതിഷേധ മാർച്ച്. ബി.ജെപി സംസ്ഥാന അധ്യക്ഷൻ കെ. സുരേന്ദ്രൻ നയിക്കുന്ന ബഹുജന മാർച്ച് ബ്രഹ്മപുരത്ത് നിന്നും ആരംഭിച്ച് കൊച്ചി കോർപ്പറേഷനിലെത്തി. ബ്രഹ്മപുരം വിഷയത്തിൽ ഒന്നാം പ്രതി മുഖ്യമന്ത്രി പിണറായി വിജയനാണെന്ന് കെ.സുരേന്ദ്രൻ പറഞ്ഞു. അഴിമതിക്കറ വൈക്കം വിശ്വനിൽ മാത്രമായി ഒതുങ്ങുന്നില്ലെന്നും അഴിമതിയുടെ പാപക്കറ നേരെ ചെല്ലുന്നത് മുഖ്യമന്ത്രിയിലേക്കാണെന്നും സുരേന്ദ്രൻ കൂട്ടിച്ചേർത്തു.
ചാരിത്ര്യ പ്രസംഗം നടത്താൻ കോൺഗ്രസിന് അവകാശമില്ല. പ്രതിപക്ഷത്തിനും ഈ അഴിമതിയിൽ പങ്കുണ്ട്. പ്രതിപക്ഷ നേതാവിനും കോൺഗ്രസിനും ഈ പാപക്കറയിൽ നിന്നും ഒഴിഞ്ഞു നിൽക്കാനാവില്ലെന്നും അദ്ദേഹം പറഞ്ഞു. കൊച്ചിയിലെ മനുഷ്യർ ഗിനിപ്പന്നികളല്ലെന്നും പകർച്ചവ്യാധി ഭീതിയിൽ കഴിയുകയാണെന്നും സുരേന്ദ്രൻ കൂട്ടിച്ചേർത്തു.
കേരളമൊട്ടാകെ ഇത്തരത്തിലുള്ള അഴിമതി കരാറുകളാണെന്നും കോഴിക്കോട് ഞെളിയൻപറമ്പിലെ മാലിന്യസംസ്കരണ പ്ലാന്റിന്റെ സ്ഥിതിയും മറ്റൊന്നല്ല. അവിടം മറ്റൊരു ബ്രഹ്മപുരമാകുമെന്ന ഭീതിയിലാണ് ജനങ്ങളെന്നും അദ്ദേഹം പറഞ്ഞു. ബ്രഹ്മപുരത്ത് മാലിന്യസംസ്കരണ പ്ലാന്റിലെ തീയണയ്ക്കാൻ കേന്ദ്രം സഹായം വാഗ്ദാനം ചെയ്തിരുന്നെങ്കിലും സംസ്ഥാന സർക്കാർ മറുപടി നൽകാൻ തയ്യാറായില്ലെന്നും സുരേന്ദ്രൻ ആരോപിച്ചു. അഴിമതിയുടെ കള്ളക്കഥകൾ പുറത്ത് വരണമെന്നും സുരേന്ദ്രൻ ആവശ്യപ്പെട്ടു.
Comments