ചെന്നൈ:പ്രണയം അവസാനിപ്പിച്ചതിന് യുവാവ് നഴ്സിംഗ് വിദ്യാർത്ഥിനിയെ കഴുത്തറുത്ത് കൊലപ്പെടുത്തി. തമിഴ്നാട്ടിൽ രാധാപുരം ജില്ലയിലാണ് സംഭവം. ധരണിയെന്ന യുവതിയാണ് കൊല്ലപ്പെട്ടത്. സംഭവത്തിൽ യുവതിയുടെ മുൻ കാമുകൻ ഗണേഷിനെ പോലീസ് അറസ്റ്റ് ചെയ്തു.
ധരണിയും ഗണേഷും തമ്മിൽ 5 വർഷമായി പ്രണയത്തിലായിരുന്നു. ലഹരിക്കടിമയും അക്രമ സ്വഭാവവുമുള്ള വ്യക്തിയാരുന്നു ഗണേഷ്. അത് മനസ്സിലാക്കിയ ധരണി ഇയാളുമായുള്ള ബന്ധം കഴിഞ്ഞ വർഷം അവസാനിപ്പിച്ചു. തുടർന്ന് നഴ്സിംഗ് പഠനത്തിനായി ചെന്നൈയിലേക്ക് പോവുകയും ചെയ്തു. ധരണിക്ക് അമ്മ മാത്രമാണുള്ളത്.
ഇക്കഴിഞ്ഞ ഫെബ്രുവരിയിൽ ലീവിനെത്തിയ ധരണിയെ കാണാൻ ഗണേഷ് പലതവണ ശ്രമിച്ചിരുന്നുവെങ്കിലും നടന്നില്ല. വ്യാഴാഴ്ച രാത്രി ഫോണിൽ ബന്ധപ്പെട്ടപ്പോൾ താൻ ചെന്നൈയിലേക്ക് പോയതായി ധരണി ഗണേഷിനെ അറിയിച്ചു.
എന്നാൽ ധരണി പറഞ്ഞത് കള്ളമാണെന്ന് ഗണേഷ് മനസ്സിലാക്കി. തുടർന്ന് വെള്ളിയാഴ്ച പുലർച്ചെ 5.30-ന് വീടിന് പുറത്തിറങ്ങിയ ധരണിയെ ഗണേഷ് കഴുത്തറുത്ത് കൊലപ്പെടുത്തുകയായിരുന്നു. കൊലപ്പെടുത്തിയ ശേഷം ഒളിവിൽപോയ ഗണേഷിനെ രണ്ട് മണിക്കൂറിനകം തിരുകനൂരിൽ വച്ച് പോലീസ് പിടികൂടി. പ്രതിയെ റിമാൻഡ് ചെയ്തു.
