കൊച്ചി: ബ്രഹ്‌മപുരം മാലിന്യ സംസ്‌കരണ പ്ലാന്റിലെ തീയണയ്‌ക്കാനായി ജീവൻ പണയംവെച്ച് അക്ഷീണം പ്രവർത്തിച്ച ഹിറ്റാച്ചി ഡ്രൈവർമാരെയും, ലോറി ഡ്രൈവർമാരെയും, അഗ്‌നിശമന സേന ഉദ്യോഗസ്ഥരേയും പോലീസ് ഉദ്യോഗസ്ഥരേയും കൊച്ചി കാണ്ട് ബ്രീത്ത് എന്ന കൂട്ടായ്മ ആദരിക്കുന്നു. ഞായറാഴ്ച രാവിലെ 10-ന് കാക്കനാട് ഓപ്പൺ സ്റ്റേജിൽ വച്ച് നടക്കുന്ന പൊതുപരിപാടിയിലാണ് ആദരിക്കൽ ചടങ്ങ് നടക്കുക.
സ്വന്തം ആരോഗ്യവും ജീവിതവും പണയപ്പെടുത്തി കത്തുന്ന ബ്രഹ്‌മപുരം പ്ലാസ്റ്റിക് മാലിന്യ കൂമ്പാരത്തിൽ ഏകദേശം 13 ദിവസത്തോളമാണ് ഇവർ തീയും പുകയും അണയ്‌ക്കാനായി ഇവർ കഷ്ടപ്പെട്ടത്. സർക്കാരും, മറ്റുള്ളവരും ബാക്കി എല്ലാവരെയും ആദരിച്ചപ്പോൾ ബ്രഹ്‌മപുരത്ത് പ്ലാസ്റ്റിക് കൂനയ്‌ക്ക് മുകളിൽ ഹിറ്റാച്ചി ഓടിച്ച് ജീവൻ പോലും പണയപ്പെടുത്തിയ ഡ്രൈവർമാരെ മറന്നു എന്നും, അവിടെ അറിയപ്പെടാതെ പോയ പോരാളികളെ ആദരിക്കാതെ പോകാൻ സാധ്യമല്ല എന്നതിനാലാണ് കൂട്ടായ്മ ഈ പരിപാടി നടത്തുന്നതെന്ന് കൊച്ചി കാണ്ട് ബ്രീത്ത് സംഘാടകർ അറിയിച്ചു.
‘കൊച്ചിക്ക് ശ്വാസം മുട്ടുന്നു, കൊച്ചിക്കാർക്ക് ശുദ്ധവായു വേണം, ഞങ്ങൾക്കും ജീവിക്കണം, സേവ് കൊച്ചി’ എന്നീ ആവശ്യങ്ങളുമായി ബ്രഹ്‌മപുരം വിഷയത്തിൽ ആദ്യമായി പ്രതിഷേധവുമായി മുന്നോട്ട് വന്ന കൂട്ടായ്മയാണ് കൊച്ചി കാണ്ട് ബ്രീത്ത്. ബ്രഹ്‌മപുരം വിഷയത്തിൽ മറൈൻഡ്രൈവിൽ ഈ കൂട്ടായ്മ മൊബൈൽ ഫ്ളാഷ് തെളിച്ച് നടത്തിയ ആദ്യ പ്രതിഷേധ പ്രകടനം ഏറെ ചർച്ച ചെയ്യപ്പെട്ടിരുന്നു.
തൃക്കാക്കര അസിസ്റ്റന്റ് പോലീസ് കമ്മീഷണർ പി.വി. ബേബി, തൃക്കാക്കര സബ് ഇൻസ്പെക്ടർ റോയി, ഇൻഫോപാർക്ക് സബ് ഇൻസ്പെക്ടർ ബിനു കെ.എസ്, തൃക്കാക്കര ഫയർ സ്റ്റേഷൻ ഉദ്യോഗസ്ഥൻ സതീഷ്, സൈബർസെൽ സബ് ഇൻസ്പെക്ടർ ബേബി, തൃക്കാക്കര നഗരസഭ ഹെൽത്ത് സ്റ്റാന്റിംഗ് കമ്മിറ്റി ചെയർമാൻ ഉണ്ണി കാക്കനാട്, തൃക്കാക്കരയിലെ വിവിധ വാർഡ് കൗൺസിലർമാർ എന്നിവർ പൊതുപരിപാടിയിൽ പങ്കെടുക്കും.
