ലൂസിഫറിന്റെ വൻ വീജയത്തിന് ശേഷം മലയാളികൾ ഒന്നടങ്കം കാത്തിരിക്കുന്ന സിനിമയാണ് എമ്പുരാൻ. പൃഥ്വിരാജിന്റെ സംവിധാനത്തിൽ മോഹൻലാൽ തകർത്തഭിനയിച്ച ലൂസിഫറിന്റെ രണ്ടാം ഭാഗമായാണ് എമ്പൂരാൻ എത്തുന്നത്. മുരളിഗോപിയാണ് ചിത്രത്തിന്റെ കഥയൊരുക്കുന്നത്. സ്റ്റീഫൻ നെടുമ്പള്ളിയായി മോഹൻലാൽ നിറഞ്ഞാടിയ ‘ലൂസിഫർ’ മലയാളത്തിലെ ബ്ലോക്ബസ്റ്ററുകളിൽ ഒന്നാണ്. സിനിമയുമായി ബന്ധപ്പെട്ട് വരുന്ന അപ്ഡേറ്റുകൾക്ക് കാത്തിരിക്കികയാണ് പ്രേക്ഷകർ.
എമ്പുരാന്റെ സംഗീത സംവിധായകൻ ദീപക് ദേവ് പറഞ്ഞ കാര്യങ്ങളാണ് ഇപ്പോൾ ശ്രദ്ധനേടുന്നത്. ആശാ ശരത്തിന്റെ മകൾ ഉത്തരയുടെ വിവാഹ ചടങ്ങിൽ പങ്കെടുത്ത് മടങ്ങവെ ആയിരുന്നു ദീപക്കിന്റെ എമ്പുരാനെ കുറിച്ച് പ്രതീകരിച്ചത്. ‘എമ്പുരാന്റെ പണി തുടങ്ങിയിട്ടുണ്ട്. ചിത്രത്തിന്റെ ഷൂട്ട് കുറച്ച് മാസം കഴിഞ്ഞിട്ടെ ഉള്ളൂ. എന്റെ പണി തുടങ്ങി’, എന്നാണ് ദീപക് ദേവ് പറയുന്നത്. ഒക്ടോബറിൽ എമ്പുരാന്റെ ഷൂട്ടിംഗ് ആരംഭിക്കുമെന്ന സൂചനയും ദീപക്ദേവ് നൽകുന്നുണ്ട്.
എമ്പുരാന്റെ ചിത്രീകരണം ഓഗസ്റ്റിൽ ആരംഭിക്കുമെന്ന വാർത്തകൾ നേരത്തെ പുറത്തുവന്നിരുന്നു. ഹോളിവുഡ് ചിത്രത്തിന് സമാനമായാകും ചിത്രം ഒരുക്കുക എന്നാണ് ലഭിക്കുന്ന സൂചന. മഞ്ജു വാരിയർ, ടൊവിനൊ തോമസ് തുടങ്ങിയവർ എമ്പുരാനിലും ഉണ്ടാകും. എമ്പുരാൻ നിർമ്മിക്കുന്നത് ആശിർവാദ് സിനിമാസും പൃഥ്വിരാജ് പ്രൊഡക്ഷൻസും തെന്നിന്ത്യയിലെ മുൻനിര നിർമ്മാണ കമ്പനിയായ ഹൊംബാളെ ഫിലിംസും സംയുക്തമായാണെന്ന് റിപ്പോർട്ടുകൾ നേരത്തെ പുറത്തുവന്നിരുന്നു.
