തൊഴിൽ അന്വേഷകർക്കിതാ വ്യത്യസ്തമായ ജോലി വാഗ്ദാനം ചെയ്ത് അമേരിക്കയിലെ വന്യജീവി സംരക്ഷണ ഏജൻസി. ‘ന്യൂ മെക്സിക്കോ ഡിപ്പാർട്ട്മെന്റ് ഓഫ് ഗെയിം ആൻഡ് ഫിഷിലേക്ക് ‘ബിയർ ഹഗ്ഗർ’മാരെ ആവശ്യമുണ്ട്’ എന്ന പരസ്യമാണ് ഏജൻസി നൽകിയിരിക്കുന്നത്. കരടിക്കുട്ടികളുടെ സംരക്ഷണത്തിനും പരിപാലനത്തിനുമാണ് ഏജൻസി പുതിയ തസ്തികയിലേക്ക് ഉദ്യോഗാർത്ഥികളെ ക്ഷണിച്ചിരിക്കുന്നത്. ഏജൻസിയുടെ ഔദ്യോഗിക സമൂഹമാദ്ധ്യങ്ങളിലൂടെയാണ് പരസ്യം നൽകിയിരിക്കുന്നത്.
പ്രസ്തുത തസ്തികയിലേക്കുള്ള അവസാന അപേക്ഷാ തീയതി മാർച്ച് 30 ആണ്. ഏത് പ്രതികൂല സാഹചര്യങ്ങളിലും കാൽനടയായി കരടികളുടെ മാളങ്ങലിലെത്തി അവയ്ക്ക് ആവശ്യമായ ശുശ്രൂഷ നൽകണമെന്നതാണ് ഉദ്യോഗാർത്ഥികളുടെ പ്രധാന യോഗ്യതയായി ഏജൻസി അറിയിച്ചിരിക്കുന്നത്.
ന്യൂ മെക്സിക്കോയിൽ കറുത്ത കരടികൾ ഇപ്പോൾ വ്യാപകമായി വംശനാശ ഭീഷണി നേരിട്ടുകൊണ്ടിരിക്കുകയാണ്. ബാക്കിയുള്ള കരടികളെ സംരക്ഷിക്കുക എന്ന ലക്ഷ്യം മുന്നിൽ കണ്ടാണ് പ്രത്യേക ജീവനക്കാരെ നിയമിക്കുന്നത്. വംശനാശ ഭീഷണി നേരിടുന്ന മൃഗങ്ങളുടെ പട്ടികയിൽ ഇവയെ ഉൾപ്പെടുത്തിയിട്ടുണ്ടെങ്കിലും വ്യാപകമായി വേട്ടയാടപ്പെടുന്ന സാഹചര്യത്തിലാണ് ഏജൻസിയുടെ പുതിയ നീക്കം.
ജീവനക്കാരെ തേടുന്നു എന്ന പരസ്യത്തിനൊപ്പം, ജനിച്ച് ഏതാനും ദിവസങ്ങൾ മാത്രം പ്രായമുള്ള കരടിക്കുട്ടികളെ തഴുകുന്ന കൺസർവേഷൻ സ്പെഷ്യലിസ്റ്റുകളുടെ ചിത്രങ്ങളും ഏജൻസി സമൂഹമാദ്ധ്യമത്തിൽ പങ്കുവെച്ചിട്ടുണ്ട്. വന്യജീവി, വന്യജീവി പരിപാലനം എന്നിവയെക്കുറിച്ച് പൊതുജനങ്ങളെ പഠിപ്പിക്കുന്നതിന് പുറമേ, വന്യജീവി സർവ്വേകൾ നടത്തുക, വിളകൾക്കും വസ്തുവകകൾക്കും വന്യജീവികൾ വരുത്തുന്ന നാശനഷ്ടങ്ങളെ കുറിച്ച് അന്വേഷിക്കുക, വന്യജീവികളെ മാറ്റിപ്പാർപ്പിക്കാൻ സഹായിക്കുക തുടങ്ങിയവയാണ് പ്രസ്തുത തസ്തികയിലേക്ക് തിരഞ്ഞെടുക്കപ്പെടുന്നവരുടെ മറ്റ് ജോലികൾ.
മെക്സിക്കോയിലെ ഗ്രാമ പ്രദേശങ്ങളിൽ താമസിക്കാൻ സന്നദ്ധരായിട്ടുള്ളവർ മാത്രമെ ജോലിക്ക് അപേക്ഷ സമർപ്പിക്കാവൂ എന്ന നിർദേശവും പരസ്യത്തിനൊപ്പമുണ്ട്. വന്യജീവികളോട് താൽപര്യമുള്ള വ്യക്തികൾക്ക് മികച്ച അവസരമായിരിക്കും ഈ ജോലി. കരടികളുടെ സംരക്ഷണത്തിനും അവയുടെ ദീർഘകാല നിലനിൽപ്പ് ഉറപ്പാക്കുന്നതിലും സുപ്രധാന പങ്ക് വഹിക്കുന്ന ജോലിയാണ് ബിയർ ഹഗ്ഗർമാരുടേത്.
Comments