ട്വിറ്ററിന്റെ പ്രധാന സുരക്ഷ സംവിധാനങ്ങളിലൊന്നായ ടൂ ഫാക്ടർ ഒതന്റിക്കേഷൻ ലഭ്യമാകുന്നതിനും ഇനി മുതൽ ഉപഭോക്താക്കൾ പണം നൽകണം. ട്വിറ്ററിൽ ഇൻബിൽറ്റ് ആയി നൽകുന്ന എസ്എംഎസ് വഴി ലഭ്യമാകുന്ന ടൂ ഫാക്ടർ ഒതന്റിക്കേഷൻ സേവനത്തിനാണ് ഇനി പണം അടയ്‌ക്കേണ്ടി വരിക. മാർച്ച് 20-മുതലാണ് ഈ മാറ്റം നിലവിൽ വരുക എന്നാണ് കമ്പനി അധികൃതർ അറിയിച്ചത്.
ട്വിറ്ററിലെ സബ്‌സ്‌ക്രിപ്ഷൻ സേവനമായ ട്വിറ്റർ ബ്ലൂവിന്റെ വരിക്കാർക്ക് മാത്രമാവും ഉപയോക്താവിന്റെ അക്കൗണ്ടിന് അധിക സുരക്ഷയൊരുക്കുന്ന ടൂ ഫാക്ടർ ഒതന്റിഫിക്കേഷൻ സേവനം ലഭ്യമാവുക. കൂടാതെ പുതിയൊരു ഉപകരണത്തിൽ ട്വിറ്റർ ലോഗിൻ ചെയ്യുകയാണെങ്കിൽ ഉപഭോക്താവിന്റെ ഫോണിൽ ഒരു വേരിഫിക്കേഷൻ കോഡ് എസ്എംഎസ് ആയി ലഭിക്കും. ഈ കോഡ് നിർദ്ദിഷ്ട ഇടത്ത് നൽകിയാൽ മാത്രമേ അക്കൗണ്ട് ലോഗിൻ ചെയ്ത് ഉപയോഗിക്കുവാൻ സാധിക്കൂ. യൂസർ നെയിമും പാസ്‌വേർഡും ഉപയോഗിച്ച് അക്കൗണ്ടുകൾ ദുരുപയോഗം ചെയ്യുന്നത് തടയുക എന്ന ലക്ഷ്യത്തോടെയാണ് ഇത്തരമൊരു സംവിധാനം ഒരുക്കിയിരിക്കുന്നത്.
എന്നാൽ ഇപ്പോൾ ലഭിക്കുന്ന റിപ്പോർട്ട് പ്രകാരം ട്വിറ്റർ ബ്ലൂ വരിക്കാർക്ക് മാത്രമാകും ഇനി മുതൽ സേവനം ലഭ്യമാകുക എന്നാണ് കമ്പനിയുടെ അറിയിപ്പ്. ടെക്സ്റ്റ് മെസ്സേജ് വഴി ലഭ്യമാകുന്ന വേരിഫിക്കേഷൻ സംവിധാനം മാർച്ച് 20-മുതൽ ഓട്ടോമാറ്റിക് ആയി ഓഫ് ആകും.
എന്നാൽ ഉപയോക്താവിന്റെ അക്കൗണ്ടിൽ നിന്നും ഫോൺനമ്പർ നീക്കം ചെയ്തിട്ടില്ല എന്നും ട്വിറ്റർ അറിയിച്ചു.
Comments