‘കണ്ണുകൾക്ക് വിരുന്നൊരുക്കി ഉദ്യാനം സന്ദർശകർക്കായി തുറന്നിരിക്കുന്നു’ ; ശ്രീനഗറിലെ ടുലിപ് ഉദ്യാനത്തിന്റെ മനംകവരുന്ന ചിത്രങ്ങൾ പങ്കുവെച്ച് ഐഎഎസ് ഉദ്യോഗസ്ഥ

ശ്രീനഗറിപ്പോൾ ടുലിപ് പുഷ്പങ്ങളുടെ റാണിയാണ്. അടുത്തിടെയാണ് ഏഷ്യയിലെ ഏറ്റവും വലിയ ടുലിപ് ഉദ്യാനം സന്ദർശകർക്കായി തുറന്നുകൊടുത്തത്. ദാൽ തടാകത്തിനും സബർവാൻ പർവ്വതനിരയ്‌ക്കും ഇടയിലാണ് ഉദ്യാനം സ്ഥിതി ചെയ്യുന്നത്. ഏകദേശം 15 ലക്ഷത്തോളം പുഷ്പങ്ങളാണ് ഉദ്യാനത്തിലുള്ളത്. ഉദ്യാനത്തിന്റെ മനം കുളിർപ്പിക്കുന്ന ചിത്രങ്ങളാണ് ഐഎസ് ഉദ്യോഗസ്ഥയായ സലോനി റായി പങ്കുവെച്ചിരിക്കുന്നത്. ട്വിറ്ററിലൂടെയാണ് മനോഹര ചിത്രങ്ങൾ പങ്കുവെച്ചിരിക്കുന്നത്. ‘ കണ്ണുകൾക്ക് വിരുന്നൊരുക്കി ശ്രീനഗറിലെ ടുലിപ് ഉദ്യാനം സന്ദർശകർക്കായി തുറന്നിരിക്കുന്നു’ -എന്ന അടിക്കുറിപ്പോടെയാണ് പോസ്റ്റ് പങ്കുവെച്ചത്.

നിരവധി പേരാണ് പോസ്റ്റിന് കമന്റുമായെത്തിയത്. ഏറ്റവും മികച്ച ചിത്രങ്ങൾ പതിയുന്നത് നയനങ്ങളിലാണ്, അത്തരം കാഴ്ചകൾക്ക് സാക്ഷ്യം വഹിക്കുന്നത് വഴി മനസിന് കുളിർമയും സമാധാനവും സന്തോഷവും ലഭിക്കുന്നു എന്നാണ് ഒരാൾ കമന്റ് ചെയ്തത്. വശ്യമനോഹരിയാണ് ശ്രീനഗറിലെ ഉദ്യാനമെന്നാണ് മറ്റൊരാൾ കുറിച്ചത്.

Tulip Garden in Srinagar is now open for tourists and is absolutely a treat to the eyes! 🌷🌸 pic.twitter.com/NFzpGWfcTr

— Saloni Rai IAS (@rai_saloni) March 20, 2023

2021 മാർച്ച് 25-നാണ് ലെഫ്റ്റനന്റ് ഉപദേഷ്ടാവ് ബസീർ അഹമ്മദ് ഖാൻ ഔദ്യോഗികമായി ഉദ്യാനം സന്ദർശകർക്കായി തുറന്നുകൊടുത്തത്. ആദ്യത്തെ അഞ്ച് ദിവസം കൊണ്ട് തന്നെ 50,000 സന്ദർശകരെയാണ് ടുലിപ്പ് ഉദ്യാനം വരവേറ്റത്. ഇത്തവണ ഒരു ദശലക്ഷത്തിലധികം പൂക്കളാണ് വിടർന്നിട്ടുള്ളത്. ഒരു മാസം മാത്രമാണ് ഉദ്യാനത്തിലേക്ക് പ്രവേശനം അനുവദിക്കുക.