നടി ആശ ശരത്തിന്റെ ഭർത്താവ് ശരത് വാര്യരെക്കുറിച്ച് അനൂപ് ശിവശങ്കരൻ എഴുതിയ കുറിപ്പ് വൈറലായിരിക്കുകയാണ്. ആശ ശരത്തിന്റെ മകളുടെ വിവാഹസമയത്ത് ഏറെ വിവാദ പരാമർശങ്ങൾ പുറത്ത് വന്നിരുന്നു. ഈ സമയത്ത് ശരത്ത് നടത്തിയ പ്രതികരണമാണ് ഇത്തരത്തിൽ ഒരു പോസ്റ്റിടുവാൻ പ്രേരിപ്പിച്ചതെന്ന് അനൂപ് പറഞ്ഞു.
‘ ആശയെ വിവാഹം കഴിച്ചപ്പോൾ അവർ തന്നോട് പറഞ്ഞത്, ഡാൻസ് അവരുടെ രക്തമാണ് എന്നാണ്. അങ്ങനെയെങ്കിൽ ഞാൻ രക്തത്തെ പമ്പ് ചെയ്യുന്ന ഹൃദയമായി തുടരുമെന്ന് പറഞ്ഞു. അതുപോലെ തന്റെ മകൾക്കും കലയോട് മൂല്യം കൽപിക്കുന്ന ഒരു കുടുംബ ബന്ധം ഉണ്ടാവട്ടെ’ എന്നായിരുന്നു ശരത് പറഞ്ഞത്. കുടുംബസ്ഥയായ കലാകാരിക്ക് ലഭിക്കുന്ന ഏറ്റവും വലിയ ഭാഗ്യം അവരെ മനസ്സിലാക്കുന്ന ജീവിത പങ്കാളി ഒപ്പമുണ്ടാവുക എന്നതാണെന്നും ശരത് അത്തരത്തിലുള്ള ഒരു ഭർത്താവാണെന്നും കുറിപ്പിലുണ്ട്. എന്നാൽ ജീവിതത്തിൽ കലയ്ക്ക് വളരെയധികം പ്രാധാന്യം കൽപ്പിക്കുന്ന വ്യക്തിയെക്കുറിച്ച് ചില ഓൺലൈൻ മാദ്ധ്യമങ്ങൾ ട്രോളുകൾ പ്രചരിപ്പിച്ചത് ശരിയായില്ലെന്നും അനൂപ് ശിവശങ്കരൻ വിമർശിച്ചു.
അനൂപ് ശിവശങ്കരന്റെ പോസ്റ്റിന്റെ പൂർണരൂപം…
‘ആശാ ശരത്തിന്റെ മകളുടെ വിവാഹ ക്ലിപ്പുകളിൽ എനിക്കേറ്റവും ശ്രദ്ധേയമായി തോന്നിയത് അവരുടെ ഭർത്താവിന്റെ വാക്കുകളാണ്. മകളുടെ വിവാഹത്തെക്കുറിച്ച് ചോദിച്ച ചോദ്യത്തിന് മറുപടിയായാണ് അദ്ദേഹം പറയുന്നത് – ‘ആശയെ വിവാഹം കഴിച്ചപ്പോൾ അവർ തന്നോട് പറഞ്ഞത് ഡാൻസ് അവരുടെ രക്തമാണ് എന്നാണ് – അങ്ങനെയെങ്കിൽ ഞാൻ ആ രക്തത്തെ പമ്പ് ചെയ്യുന്ന ഹാർട്ട് ആയി തുടരുമെന്നാണ്! അത് പോലെ തന്റെ മകൾക്കും കലക്ക് മൂല്യം കൽപ്പിക്കുന്ന ഒരു കുടുംബബന്ധം ഉണ്ടാവട്ടെ’
വളരെ യുക്തിസഹജമായി സംസാരിക്കുന്ന ഈ മനുഷ്യനെയാണ് ചില ഓൺലൈൻ പത്രക്കാർ എൻഗേജ്മെന്റ് വീഡിയോ ക്ലിപ്പുകൾ അടർത്തി മാറ്റി ട്രോൾ ഇറക്കിയത്! കുടുംബസ്ഥയായ ഒരു കലാകാരിക്ക് കലാജീവിതത്തിൽ ഉയരങ്ങളിൽ എത്തണമെന്നുണ്ടെങ്കിൽ ഏറ്റവും വലിയ ഭാഗ്യം വേണ്ടത് അവരുടെ ജീവിതചര്യ മനസ്സിലാക്കാൻ കഴിയുന്ന ജീവിതപങ്കാളിയെ ലഭിക്കുകയാണ്! ഒരു സെലിബ്രിറ്റി ആയിരിക്കുക എളുപ്പമേയല്ല. മറ്റേതൊരു കരിയറിനേക്കാളും സങ്കീർണമാണ് ഒരു പെർഫോർമിംഗ് ആർട്ടിസ്റ്റിന്റെ കലാജീവിതം ഡിമാൻഡ് ചെയ്യുന്ന തയ്യാറെടുപ്പുകൾ!
സുജാതയുടെയും സിത്താരയുടെയും സഫലമായ സംഗീതജീവിതം കാണുമ്പോഴുമൊക്കെ തോന്നും മോഹന്റെയും സജീഷിന്റെയും നിസ്വാർത്ഥമായ ഉയർന്നചിന്ത ഇല്ലായിരുന്നെങ്കിൽ അത് സാധ്യമാവുമായിരുന്നോ എന്ന്. അത് കൊണ്ട് തന്നെ സാരികളുടെ മിന്നിച്ചകൾക്കുമപ്പുറം എനിക്ക് താരമായി തോന്നിയത്, ശ്രീ ശരത്താണ് – ആശയുടെ നൃത്തച്ചുവടുകൾക്ക് കൂച്ചുവിലങ്ങിടാതിരുന്ന ശരത്ത്’
സമൂഹമാദ്ധ്യമങ്ങളിൽ ഇതിനോടകം തന്നെ നിരവധി പേരാണ് ശരതിനെ അഭിനന്ദിച്ച് കൊണ്ട് പോസ്റ്റുകൾ പങ്കുവെച്ചിരിക്കുന്നത്.
Comments