ഇന്റർനെറ്റിൽ കുട്ടികളുടെ സ്വകാര്യത ഉറപ്പുവരുത്തുന്ന നിയമത്തിന് അംഗീകാരം നൽകി ഫ്രഞ്ച് പാർലമെന്റ്. കുട്ടികളുടെ ചിത്രങ്ങൾ ഇനി സമൂഹമാദ്ധ്യമങ്ങളിൽ പങ്കുവയ്ക്കുന്നതിലാണ് വിലക്കേർപ്പെടുത്തിയിരിക്കുന്നത്. പാർലമെന്റ് അംഗം ബ്രൂണോ സ്റ്റഡർ അവതരിപ്പിച്ച ബിൽ ഏകകണ്ഠമായാണ് ഫ്രഞ്ച് ദേശീയ അസംബ്ലി അംഗീകാരം നൽകി നടപ്പിലാക്കിയത്.
പുതിയ നിയമപ്രകാരം കുട്ടികളുടെ അനുമതിയില്ലാതെ ചിത്രങ്ങൾ സമൂഹമാദ്ധ്യമങ്ങളിൽ പങ്കുവയ്ക്കുകയാണെങ്കിൽ അത് ശിക്ഷാർഹമായ കുറ്റകരമായാണ് കണക്കാക്കുക. കുട്ടികളുടെ സ്വകാര്യത സംരക്ഷിക്കപ്പെടുന്നതിന്റെ ഉത്തരവാദിത്വം രക്ഷിതാക്കൾക്കായിരിക്കുമെന്നും നിയമത്തിൽ പരാമർശിച്ചിട്ടുണ്ട്. നിയമം പൂർണ്ണമായും പ്രാബല്യത്തിൽ വരുന്നതിന് ഇനി സെനറ്റിന്റെ കൂടി അംഗീകാരം ആവശ്യമുണ്ട്. ഔദ്യോഗികമായി നിയമം പ്രാബല്യത്തിലാകുന്നതിന് മുമ്പ് തന്നെ പ്രസിഡന്റ് പരസ്യ വിളബരം നടത്തും.
മാതാപിതാക്കൾക്ക് കുട്ടികളുടെ ചിത്രങ്ങളിൽ സമ്പൂർണ്ണാവകാശമില്ലെന്ന് പഠിപ്പിക്കുക എന്നതാണ് നിയമത്തിലൂടെ ലക്ഷ്യം വയ്ക്കുന്നതെന്ന് ബ്രൂണോ സ്റ്റഡർ പറഞ്ഞു. ഫ്രാൻസിൽ 13 വയസ്സ് പ്രായമുള്ള ഒരു കുട്ടിയുടേതായി ശരാശരി 13,000 ചിത്രങ്ങളാണ് ഇന്റർനെറ്റിലൂടെ പ്രചരിക്കുന്നതെന്ന് നിയമം അവതരിപ്പിച്ചുകൊണ്ട് എംപി ചൂണ്ടിക്കാട്ടിയിരുന്നു. സമൂഹമാദ്ധ്യമങ്ങളിൽ പ്രചരിക്കുന്ന കുട്ടികളുടെ ചിത്രങ്ങൾ ദുരുപയോഗപ്പെടുത്തുവാനുള്ള സാധ്യത ഏറെയാണ്.
കുട്ടികളുടെ അശ്ലീലചിത്രങ്ങളിൽ ഉപയോഗിക്കപ്പെടുന്ന 50 ശതമാനം ചിത്രങ്ങളും മാതാപിതാക്കൾ സമൂഹമാദ്ധ്യമങ്ങളിൽ പ്രചരിപ്പിച്ചവയാണ്. ഇതിന്റെ പരിണിത ഫലമായി കുട്ടി വിവിധയിടങ്ങളിൽ വേട്ടയാടപ്പെടാനുള്ള സാഹചര്യവും ഏറെയാണെന്ന് ബ്രൂണോ സ്റ്റഡർ കൂട്ടിച്ചേർത്തു.
