ലോകേഷ് കനകരാജിന്റെ സംവിധാനത്തിൽ ഒരുങ്ങി വിജയ് നായകനാവുന്ന ചിത്രമാണ് ലിയോ. ജമ്മുകശ്മീരിൽ ചിത്രത്തിന്റെ ചിത്രീകരണം നടന്നുവരികയാണ്. ഇതിനിടെയാണ് അഫ്ഗാനിസ്ഥാനിലുണ്ടായ ഭൂചലനത്തിന്റെ തുടർ ചലനങ്ങൾ കശ്മീരിലും ഉണ്ടാവുന്നത്. ഭൂചലനം നേരിട്ട് അനുഭവിച്ചെന്ന് പറഞ്ഞിരിക്കുകയാണ് ലിയോയുടെ അണിയറപ്രവർത്തകർ.
ചിത്രത്തിന്റെ നിർമ്മാതാക്കളായ സെവൻ സ്‌ക്രീൻ സ്റ്റുഡിയോസ് ട്വിറ്ററിലൂടെയാണ് ഇക്കാര്യം അറിയിച്ചത്. ഞങ്ങൾ സുരക്ഷിതരായിരിക്കുന്നുവെന്നാണ് ടീറ്റ് ചെയ്തത്. ചന്ദ്രമുഖി എന്ന ചിത്രത്തിലെ വടിവേലു അവതരിപ്പിച്ച കഥാപാത്രത്തിന്റെ ചെറു വീഡിയോയും കുറിപ്പിനൊപ്പം പോസ്റ്റ് ചെയ്തിട്ടുണ്ട്. ലിയോ ടീം ഭൂചലനം നേരിട്ടനുഭവിച്ചതിന്റെ പ്രതീതാത്മകമായ വിവരണമാണിതെന്നാണ് കരുതുന്നത്.
മാസ്റ്റർ എന്ന ചിത്രത്തിന് ശേഷം വിജയിയും ലോകേഷ് കനകരാജും വീണ്ടും ഒന്നിക്കുന്ന ചിത്രമാണ് ലിയോ. സഞ്ജയ് ദത്ത്, മിഷ്‌കൻ, ഗൗതം മേനോൻ, അർജുൻ, തൃഷ, പ്രിയ ആനന്ദ്, മാത്യു തോമസ് എന്നിവരാണ് ചിത്രത്തിൽ മറ്റ് ശ്രദ്ധേയമായ കഥാപാത്രങ്ങളെ അവതരിപ്പിക്കുന്നത്. ഏതാനും ആഴ്ചകൾക്ക് മുമ്പാണ് സഞ്ജയ് ദത്ത് സിനിമയിലേക്കെത്തുന്നത്. ചിത്രത്തിൽ വില്ലൻ വേഷത്തിലാണ് താരം എത്തുന്നത്. കെജിഎഫ് : ചാപ്റ്റർ 2-ന് ശേഷം സഞ്ജയ് ദത്ത് അഭിനയിക്കുന്ന തെന്നിന്ത്യൻ ചിത്രം കൂടിയാണ് ലിയോ.
Comments