തെന്നിന്ത്യൻ സിനിമാ പ്രേക്ഷകരുടെ പ്രിയപ്പെട്ട താരമാണ് കീർത്തി സുരേഷ്. താരത്തിനെ കേന്ദ്ര കഥാപാത്രമാക്കി നാഗ് അശ്വിൻ സംവിധാനം ചെയ്ത ചിത്രമാണ് മഹാനടി. ചിത്രത്തിലേക്ക് തന്നെ വിളിച്ചപ്പോഴുള്ള അനുഭവം പങ്കുവെക്കുകയായിരുന്നു നടി. ആദ്യം ചിത്രത്തിലേക്ക് തന്നെ വിളിച്ചിരുന്നു എന്നാൽ അപ്പോൾ താൻ താത്പര്യം പ്രകടിപ്പിച്ചില്ലെന്നും സംവിധായകനാണ് തന്നെ സമ്മതിപ്പിച്ചതെന്നും നടി ഒരു അഭിമുഖത്തിൽ പറഞ്ഞു.
സിനിമയിലെ കഥാപാത്രം ട്രോൾ ചെയ്യപ്പെടുമെന്ന് തനിക്ക് ഭയമായിരുന്നു. എന്നാൽ സംവിധായകന് തന്നിലുള്ള വിശ്വാസം കണ്ടപ്പോഴാണ് സിനിമ ചെയ്യാനുള്ള ധൈര്യം വന്നതെന്നും താരം വ്യക്തമാക്കി. ”മഹാനടിയുടെ തുടക്കത്തിൽ ഞാൻ ആ സിനിമയിലേക്ക് ഇല്ലെന്നാണ് പറഞ്ഞത്. എനിക്ക് ഭയങ്കര പേടിയായിരുന്നു. നാഗിയാണ് എന്നെ പറഞ്ഞ് കൺവീൻസ് ചെയ്തത്. നിനക്ക് ഇത് ചെയ്യാൻ പറ്റുമെന്ന് എന്നോട് നാഗി പറഞ്ഞു. ഒരാൾ എന്നെ ഇത്രയും വിശ്വസിക്കുമ്പോൾ ഞാൻ എങ്ങനെ സ്വയം എന്റെ കഴിവിൽ വിശ്വസിക്കാതിരിക്കുമെന്ന് ഞാൻ ചിന്തിച്ചു.
അങ്ങനെയാണ് ഞാൻ മഹാനടി ഏറ്റെടുത്തത്. ആ വേഷം ചെയ്താൽ ഞാൻ ട്രോൾ ചെയ്യപ്പെടുമോയെന്ന ഭയമായിരുന്നു. കുറേ കഴിഞ്ഞാണ് അങ്ങനെ ഉണ്ടാവില്ല എന്ന കാര്യം ഞാൻ മനസിലാക്കിയത്. ആളുകൾ എന്നെ ട്രോളും എന്ന് തന്നെയാണ് വിചാരിച്ചത്. സോഷ്യൽ മീഡിയയിലൂടെ ഉണ്ടാകുന്ന നെഗറ്റിവിറ്റിയെക്കുറിച്ച് ചിന്തിക്കേണ്ടതില്ലെന്ന് ഞാൻ സ്വയം ബോധ്യപ്പെടുത്തി. ഓൺ സ്ക്രീനിലും ഓഫ് സ്ക്രീനിലും റിയലായിട്ട് നിന്നാൽ മതി. ആളുകൾ നമ്മളെ ഇഷ്ടപ്പെടും.” കീർത്തി സുരേഷ് പറഞ്ഞു
