ധനുഷുമായുള്ള രണ്ടാം വിവാഹത്തെ കുറിച്ചുള്ള വ്യാജ വാർത്തയിൽ പ്രതികരിച്ച് നടി മീന. ഭർത്താവിന്റെ വിയോഗം തനിക്കിപ്പോഴും അംഗീകരിക്കാൻ കഴിഞ്ഞിട്ടില്ലെന്ന് മീന വ്യക്തമാക്കി. ഇനിയുള്ള ജീവിതം മകൾക്ക് വേണ്ടിയാണെന്നും മീന പറഞ്ഞു. സിനിമയിൽ തുടരുമെന്നും നല്ല സിനിമകളിൽ അവസരം ലഭിച്ചാൽ അഭിനയിക്കുമെന്നും താരം വ്യക്തമാക്കി.
വിദ്യാസാഗറിന്റെ വിയോഗം എനിക്ക് ഇപ്പോഴും വിശ്വസിക്കാനായിട്ടില്ല. അപ്പോഴേക്കും എങ്ങനെയാണ് സോഷ്യൽ മീഡിയയിലൂടെ ഇത്തരത്തിലുളള വ്യാജവാർത്തകൾ പ്രചരിക്കുന്നത്. ഇനിയുളള ജീവിതം മകൾക്ക് വേണ്ടിയാണ്. അവളുടെ ഭാവിക്കാണ് മുൻഗണന നൽകുന്നത്. കൂടാതെ നല്ല കഥകൾ ലഭിക്കുകയാണെങ്കിൽ സിനിമയിൽ അഭിനയിക്കും’ എന്നായിരുന്നു മീനയുടെ വാക്കുകൾ.
2022 ജൂൺ 28 നാണ് മീനയുടെ ഭർത്താവ് വിദ്യാസാഗർ അന്തരിച്ചത്. ശ്വാസകോശ സംബന്ധമായ രോഗത്തെ തുടർന്ന് ചികിത്സയിൽ കഴിയവെയായിരുന്നു അന്ത്യം. വീണ്ടും താരം വെള്ളിത്തിരയിൽ സജീവമാകാൻ തുടങ്ങവെ ആയിരുന്നു പുതിയ വിവാദങ്ങൾ പുറത്ത് വന്നത്. മീനയും നടൻ ധനുഷും വിവാഹിതരാവുന്നു എന്നുള്ള ബയൽവാൻ രംഗനാഥന്റെ വെളിപ്പെടുത്തൽ വലിയ ചർച്ചയായിരുന്നു. രണ്ടാളും ചെറുപ്പക്കാരാണ്, നാൽപത് വയസേ ഉള്ളു. ഇരുവർക്കും പങ്കാളികളികളില്ലാത്തത് കൊണ്ട് പുതിയൊരു ജീവിതം ഉണ്ടാവുന്നതിൽ തെറ്റൊന്നുമില്ല. ഈ ജൂണിൽ ഇവർ വിവാഹിതയായേക്കും. ചിലപ്പോൾ വിവാഹം കഴിക്കാതെ ലിവിംഗ് ടുഗദറായി ജീവിച്ചേക്കാമെന്നാണ് ബയൽവാൻ രംഗനാഥൻ പറഞ്ഞത്.
