പത്തനംതിട്ട ; വായ്പയെടുക്കാത്തയാൾക്കു തിരിച്ചടവ് നോട്ടീസ് അയച്ച് കേരള ഗ്രാമീൺ ബാങ്ക്കോന്നി ശാഖ. മലയാലപ്പുഴ പുത്തൻവീട്ടിൽ പി.കെ. അനീഷിനാണ് എടുക്കാത്ത വായ്പയ്ക്കു നോട്ടീസ് ലഭിച്ചത്. കഴിഞ്ഞ വർഷം ഏപ്രിലിൽ 3 ലക്ഷം രൂപ ലോണെടുത്തതായും പലിശ ഉൾപ്പെടെ 3,09,278 രൂപ തിരിച്ചടയ്ക്കണമെന്നുമാണ് നോട്ടീസിലുള്ളത്. ഏപ്രിൽ 25 ന് മുൻപ് അടച്ചില്ലെങ്കിൽ പലിശ ഇളവു ലഭിക്കില്ലെന്നും നോട്ടീസിലുണ്ട്.
‘‘എനിക്ക് ജോലി എറണാകുളത്താണ്. അവിടെ മാത്രമാണ് ബാങ്ക് ഇടപാടുള്ളത്. കേരള ഗ്രാമീൺ ബാങ്ക് കോന്നി ശാഖയിൽ അക്കൗണ്ടില്ല. അച്ഛന്റെ പേരിലെ ഇനീഷ്യലിൽ വന്ന തെറ്റാണ് നോട്ടീസ് ലഭിക്കാൻ കാരണമെന്നും ഇതേ പേരും വിലാസവുമുള്ളയാൾ വായ്പ എടുത്തിട്ടുണ്ടെന്നും ബാങ്ക് അധികൃതർ വിളിച്ചറിയിച്ചു. എന്നാൽ കത്തിലെ വിലാസം എനിക്കു മാത്രമാണുള്ളത്. പിന്നെങ്ങനെ മറ്റൊരാൾക്ക് കത്തു പോകുമെന്നാണ് ഇപ്പോൾ ആലോചിക്കുന്നത്. തപാൽ ജീവനക്കാരിക്ക് തെറ്റു പറ്റിയിട്ടില്ലെന്നും ഉറപ്പാണ്. മറ്റാർക്കും ഇതുപോലൊരു ദുരവസ്ഥ വരരുത്.’’ അനീഷ് പറഞ്ഞു.
അതേ സമയം പി.കെ.അനീഷ് എന്ന മറ്റൊരാൾ ഈ ബാങ്കിൽ നിന്നു വായ്പ എടുത്തിട്ടുണ്ടെന്നാണു അധികൃതർ പറയുന്നത്.
Comments