ന്യൂഡൽഹി: രാഹുൽ ഗാന്ധി ശിക്ഷിക്കപ്പെട്ട സംഭവത്തിന് പിന്നാലെ ബിജെപി നേതാവായ ഖുശ്ബുവിന്റെ പഴയ ട്വീറ്റ് കോൺഗ്രസ് കുത്തിപ്പൊക്കിയതിൽ പ്രതികരിച്ച് നടി. താൻ കോൺഗ്രസിൽ ആയിരുന്നപ്പോൾ പോസ്റ്റ് ചെയ്ത മോദി ട്വീറ്റിന്റെ പേരിൽ ലജ്ജിക്കുന്നില്ലെന്നാണ് നടി ഖുശ്ബു തുറന്നടിച്ചത്. തന്റെ പഴയ ട്വീറ്റ് ഉയർത്തിക്കാട്ടുന്നതിലൂടെ കോൺഗ്രസ് പ്രവർത്തകർ എത്രമാത്രം നിരാശരാണെന്ന് വ്യക്തമാവുന്നുണ്ടെന്നും താരം പ്രതികരിച്ചു.
അന്ന് കോൺഗ്രസ് വക്താവ് എന്ന നിലയിലുള്ള ഉത്തരവാദിത്തമാണ് ചെയ്തതെന്നും, താൻ കോൺഗ്രസ് നേതാവിനെ പിന്തുടരുകയും ആ പാർട്ടിയുടെ ഭാഷ സംസാരിക്കുകയുമാണ് ചെയ്തതെന്നും ഖുഷ്‌ബു മാദ്ധ്യമങ്ങളോട് പറഞ്ഞു. മോദി എന്നതിന്റെ അർത്ഥം അഴിമതി എന്നാക്കി മാറ്റണമെന്നുള്ള’ ഖുശ്ബുവിന്റെ 2018 ലെ ട്വീറ്റാണ് കോൺഗ്രസ് വ്യാപകമായി പ്രചരിപ്പിച്ചത്. ബി ജെ പിയുടെ സൂറത്ത് വെസ്റ്റ് എം എൽ എ പൂർണേഷ് മോദി ഖുശ്ബു സുന്ദറിനെതിരെ കേസ് നൽകുമോ എന്ന് ചോദിച്ചുകൊണ്ട് നിരവധി കോൺഗ്രസ് നേതാക്കൾ ഖുഷ്‌ബുവിന്റെ ട്വീറ്റ് പങ്കുവച്ചിരുന്നു.
എന്നാൽ, മോദി പരാമർശവുമായി ബന്ധപ്പെട്ട അപകീർത്തിക്കേസിൽ സൂറത്ത് കോടതി രാഹുല്‍ഗാന്ധിയെ രണ്ടുവര്‍ഷം തടവിന് ശിക്ഷിച്ചതോടെ രാഹുൽ വയനാട് എംപി സ്ഥാനത്തുനിന്ന് അയോഗ്യനാക്കപ്പെട്ടിരുന്നു. ഇതിന്റെ മനോവിഷമമാണ് കോൺഗ്രസ് പ്രവർത്തകരുടെ ഈ പ്രവർത്തിയ്‌ക്ക് പിന്നിലെന്നാണ് ആക്ഷേപം. ഒപ്പം തന്നെ നിഷേധാത്മകത എവിടെയും എത്തിക്കില്ലെന്നായിരുന്നു രാഹുൽ ഗാന്ധിക്കെതിരായ കോടതി വിധിയിൽ ഖുശ്ബു പ്രതികരിച്ചത്. 2020ലാണ് കോൺഗ്രസ് വിട്ട് ഖുഷ്‌ബു ബി ജെ പിയിൽ ചേർന്നത്. നിലവിൽ ദേശീയ വനിതാ കമ്മിഷൻ അംഗമാണ്.
